Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 371 Hüküm no: 610 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tekeli Türkmenlerinden olup hırsızlık yapanların hapsedilmesine rağmen kalabalık bir gurubun baskını sonucu kaçırıldıkları Merhûm ve mağfûrun-leh ebu’l-feth Sultan Mehmed Han-ı Gāzî Evkāfı kıbelinden Havâss-ı refîʻa muzâfâtından Terkos nâhiyesinde Tirkeşe nâm karyenin zâbiti olan işbu bâʻisü’l-iʻlâm el-Hâc Selim Ağa nâm kimesne Eyüb mahkemesinde meclis-i şerʻde Tekeli Türkmenlerinden ahzı fermân buyrulan beş nefer sârıklardan iki neferi Mehmed ve Süleyman nâm kimesneleri meʼmûr olan haseki kulları ahz ve matlûb olan Satılmış ve karındaşı Durmuş ve Bursalı Hüseyin nâm kimesneleri ben ahz edip meʼmûr olanlara teslîm etmek üzere karye-i mezbûrede subaşılara mahsûs konakda habseylediğimde Tekeli Türkmenleri âlet-i harbleriyle zâbitler tarafından Altıparmak nâmında çukadâr ile târîh-i iʻlâm günü seheri ale’l-gafle konağı basıp mahbûs olan üç nefer sârıkları tahlîs ve odası içinde bazıları duhûl ve maʻlûmü’l-kıyme eşyâlarımızı yağma ve gāret ve beni katl sadedinde olmalarıyla keyfiyet-i mezkûr vukūʻunda etrâf kurâlardan öşürlerin teslîm içün mevcûd bulunan işbu hâzirûn bi’l-meclis kimesneler yedlerinden beni tahlîs edip maʻlûmları olmağla suâl olunup takrîrleri baʻde’t-tahrîr vâkiʻ hâl iʻlâm olunmak matlûbumdur deyü tazallüm-ı hâl etdikde li-ecli’l-ihbâr meclis-i şerʻa hâzirûn olan Tirkeşe karyesi İmamı Mehmed Efendi ve Baklalı karyesi İmamı diğer Mehmed Efendi ve Deli Yunus karyesi İmamı es-Seyyid Osman Efendi ve Kara Halil karyesi İmamı Ömer Efendi ve es-Seyyid Mustafa nâm kimesnelerden suâl olundukda fi’l-hakīka bizler zâbit-i mezbûr el-Hâc Selim Ağa[ʼya] öşürlerimizi teslîm içün karye-i mezbûrede konağında hâzirûn olduğumuz hâlde Tekeli Türkmenlerinden otuz mikdârı kimesneler târîh-i iʻlâm günü seheri ale’l-gafle âlet-i harbleriyle hücûm ve mahbûsları tahlîs edip keyfiyet-i hâl zâbit-i mezbûrun bâlâda takrîr ve tafsîl [60b] eylediği üzere vâkiʻ olmuşdur deyü her biri ihbâr ve taraf-ı âlîlerinden mübâşir taʻyîn buyrulup ihzâr ve icrâ-yı şerʻ ve ihkāk-ı hak olunması bâbında istidʻâ-yı merhamet eylediği bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 3 min-Şaʻbân sene 1161