Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 373 Hüküm no: 613 Orijinal metin no: [60b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb ve kızı Fâtıma’nın uygunsuz davranışlarda bulunduklarından mahalleden çıkarılmaları Maʻrûz; Medîne-i Ebâ Eyüb el-Ensârî’de vâkiʻ işbu ashâbü’l-iʻlâm Ahmed Dede Mahallesi İmamı es-Seyyid Ahmed Efendi ve Müezzin Molla Mehmed ve ahâlî-i mahalleden Mehmed b. Mustafa ve Mehmed b. İbrahim ve Mustafa b. Veli ve Ömer b. Süleyman ve Seyyid Selim b. Mustafa ve Emin b. Ahmed ve Mehmed b. Ali nâm kimesneler meclis-i şerʻ-i hatîrde mahalleleri sâkinelerinden Zeyneb ve kızı Fâtıma muvâcehelerinde mezbûretân Zeyneb ve Fâtıma kendi hâllerinde olmayıp dâima menzillerine ecnebîler gelip ihtilât ve nâ-mahremden min-külli’l-vücûh ictinâbları olmayıp hatta târîh-i iʻlâm gecesi menzillerinde bir yerde ecnebî ve nâ-mahrem kimesneler ile cemʻ oldukları hâlde ahz ve her birileri tedîb olunmalarıyla velhâsıl mezbûretân avratlardan müteezzîler olup dahi zabt u rabta kādirler olmayıp emn ü rahatımız yokdur deyü sû-i hâllerini haber [ve] mezbûretân ricâlleri [ile] maʻan mahalle-i mezbûreden ihrâc olunmaları bâbında istidʻâ-yı merhamet eyledikleri baʻde’t-tescîl bi’l-iltimâs huzûr-ı âlîlerine iʻlâm olundu. Fermân hazret-i veliyyü’l-emrindir. Fî 3 min-Şaʻbân sene 1161