Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 374 Hüküm no: 615 Orijinal metin no: [60b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’nun başka bir mahalleye ihracı Maʻrûz; Ashâb-ı arzuhâl Takyecibaşı Mahallesi İmamı Mustafa Efendi ve Müezzin Molla Mehmed ve cemâʻatlerinden Mustafa Çelebi b. el-Hâc Süleyman ve Mehmed b. Ali ve İbrahim Ağa b. el-Hâc Mustafa ve Seyyid Feyzullah b. Mehmed ve Mehmed Çelebi b. Ali ve Ahmed b. Süleyman nâm kimesneler meclis-i şerʻ-i hatîrde derûn-ı arzuhâlde mastûr Rukiye nâm hatun mukaddemâ sâkine olduğu Ağa Mahallesi ahâlîsinin iştikâ ve iltimâslarıyla bâ-iʻlâm ve bâ-fermân-ı âlî ihrâc ve hâlâ mahallemizde sâhibesi rızâsız menzile nakl etmekle mezbûre Rukiye’nin nâ-mahremden ictinâbı olmadığından mâʻadâ baʻzı ehl-i ırza itâle ve ifk ü iftirâdan hâlî olmamağla mezbûrenin mahallemizden dahi ihrâcı matlûbumuzdur deyü iştikâ-birle eyledikleri arzuhâlleri mûcebince daʻvet-i şerʻ ve ihrâcına tenbîh <> içün cânib-i şerʻden muhzır kulları defâʻat ile vardıkda görünmeyip ihzârı mümkün olmadığını her biri ihbâr ve mezbûre Rukiye bi-eyy-i hâlin meclis-i şerʻa ihzâr ve ihrâcı bâbında istidʻâ-yı merhamet eyledikleri huzûr-ı âlîlerine iʻlâm olundu. Fermân hazret-i veliyyü’l-emrindir. Fî 3 Şaʻbân sene 1161