Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 375 Hüküm no: 617 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail’in vârislerinin Debbağ el-Hâc Ahmed ve diğer Debbağ el-Hâc Ahmed’in borçları olduğu yolundaki iddiâlarını ispatlayamadıkları Maʻrûz-ı dâʻî-i Devlet-i aliyyeleridir ki; Bundan akdem fevt olan İsmail’in usûbet-i nesebiyye cihetinden karındaşı oğulları sâhib-i arzuhâl Osman ve Abdullah nâm kimesneler derûn-ı arzuhâlde isimleri mezkûr Debbağ el-Hâc Ahmed ve diğer Debbağ el-Hâc Ahmed ile terâfuʻlarında bundan akdem mûrisimiz müteveffâ-i mezbûrun mezbûrân el-Hâc Ahmed ve diğer el-Hâc Ahmed zimmetlerinde otuz aded camus derisi semeninden dokuz bin dokuz yüz akçe ve cihet-i sermâyeden yetmiş iki bin akçe ki; min-haysü’l-mecmûʻ seksen bir bin dokuz yüz akçe mûrisimiz müteveffâ-i mezbûrun hakkı olup kable’l-ahz ve’l-istîfâ fevt olmağla meblâğ-ı mezbûr bizim [ile] zevcesi gāibetü ani’l-meclis Âişe nâm hatuna mevrûs olmağla meblâğ-ı mezbûrdan isâbet eden altmış bir bin dört yüz akçeyi mezbûrân el-Hâc Ahmed ve diğer el-Hâc Ahmed’den taleb ederiz deyü daʻvâ eylediklerinde onlar dahi ber-vech-i muharrer meblâğ-ı mezbûru bi’l-külliye inkâr etmekle müddeʻiyân-ı mezbûrândan müddeʻâsını mübeyyine [beyyine] taleb olundukda ityân-ı beyyineden izhâr acz etmeleriyle talebleriyle mezbûrân el-Hâc Ahmed ve diğer el-Hâc Ahmed tahlîf-i şerʻî olunup müddeʻiyân-ı mezbûrân Osman ve Abdullah bilâ-beyyine bî-vech muʻârazadan menʻ olundukları tescîl ve mübâşiri Şatır Süleyman Çavuş kulları iltimâsıyla huzûr-ı âlîlerine iʻlâm olundu. Fermân hazret-i veliyyü’l-emrindir. Fî 6 Şaʻbân sene 1161