Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 378 Hüküm no: 625 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yapılan araştırmada Haslar ve Sütlüce civârında erâzil ve eşkıyâ takımından bir kimsenin bulunamadığı Maʻrûz; Âsitâne-i aliyye’de erâzil ve eşkıyânın bazıları tahlîs-i girîban dâʻiyesiyle Haslar ve Sütlüce ve ol havâlîye firâr ve baʻzı mahallerde hufyeten meks ve karâr eyleyen eşhâs makūleleri bulundukları mahalde maʻrifet-i şerʻle alâ-vechi’t-tahrîr teftîş ve geri vilâyetlerine iʻâde ve ircâʻ olunmaları bâbında inâyetlü bostancıbaşı ağaya hitâben şeref-sudûr bulan fermân-ı âlîşânlarını sicill-i mahfûza baʻde’l-kayd ber-mûceb-i emr-i âlî taraf-ı şerʻden taʻyîn olunan Kâtip Mollazâde Mehmed Efendi ve ağa-yı müşârun-ileyh kıbelinden meʼmûr Mehmed Haseki bendeleri Vâlidesarayı ustası kulları maʻiyetiyle tecessüs ve tefahhus olundukda Eyüb iskelesinde ve Defterdâr iskelesinde Sivaslı ve Divriğili arka hamallarından otuz nefer ve Topkapısı hâricinde Ekrâd tâifesinden ev göçer zükûr ve inâs elli iki nefer ve ol mahalde İlyaszâde Mahallesi’nde Türkmen tâifesinden kezâlik zükûr ve inâs otuz nefer ve ol havâlîde çiftciler hizmetlerinde Rumeli câniblerinden yetmiş nefer mikdârı orakçılar bi’l-cümle mahâll-i meʼmûrlarına geri iʻâde ve ircâʻ etdirilip medîne-i mezbûr mahallâtı sükkânı birbirlerine mütekeffiller olup bî-kisb ü kâr işi gücü olmayıp serseri geşt ü güzâr eder makūlelerinden ferd-i ahad kimesne bulunmayıp mübâşir-i merkūm Mehmed Haseki kulları edâ-yı hizmet eylediği iltimâsıyla huzûr-ı âlîlerine iʻlâm olundu. Fermân hazret-i veliyyü’l-emrindir. Fî 5 Şaʻbân sene 1161