Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 388 Hüküm no: 646 Orijinal metin no: [63a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sütcü Dimo v. Koco ve Anderyo’nun Panço v. Aleksi aleyhine açtıkları davayı ispatlayamadıkları Maʻrûz-ı dâʻî-i Devlet-i aliyyeleridir ki; Hâmil-i arzuhâl sütcü tâifelerinden Dimo v. Koço ve Anderyo nâm zimmîler derûn-ı arzuhâlde ismi mastûr Tâife-i mezbûreden Panço v. Aleksi zimmî ile Eyüb mahkemesinde meclis-i şerʻde terâfuʻ etdiklerinde müddeʻiyân-ı mesfûrân Dimo ve Anderi arzuhâlde tahrîr ve beyân etdirdikleri üzere tasaddî eyledikleri daʻvâlarını mesfûr Panço bi’l-külliye inkâr edip isbât etmekde izhâr-ı acz ve talebleriyle mesfûr Panço zimmîye yemîn verilmekle müddeʻiyân-ı mesfûrân Dimo ve Anderi’yi bilâ-beyyine-i âdile bî-vech muʻârazadan menʻ olunup medîne-i mezbûre mahkemesinde tescîl olunduğu mübâşiri çavuş kulları iltimâsıyla huzûr-ı âlîlerine iʻlâm olundu. Fermân hazret-i veliyyü’l-emrindir. Fî 8 min-Ramazan sene 1161