Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 388 Hüküm no: 647 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaklaşan Ramazan günlerinde ahâlinin rahatını bozacak ve fesâda düşürecek hareketlere izin verilmeyip terâvih namazından sonra açık dükkân bulundurulmaması İzzetlü bostancıbaşı ağa bi-kazâillâhi’l-Meliki’l-Mennân şehri Ramazan-ı kesîri’l-feyyâzan hulûl etmekle eyyâm ü leyâ[lî]sinde refâh-ı hâl ve safa-yı bâl-i ibâda Devlet-i Aliyye-i hazret-i şehriyârî taʻalluk eyleyip ve bâ-husûs erâzil ve süfehâ ve ehl-i hevâ makūlesi eşhâsı leyâlî-i mübâreke-i Ramazanda baʻzı dekâkînde emred-i mürâhik gulâmlar ile ihtilât ve ülfet ve îkâʻ-ı envâʻ-ı mesâvîye cesâret eyleyecekleri melhûz olmakdan nâşî ol makūle mefâsidin menʻ u defʻi mûcib-i tahsîl-i rızâ-i Rabb-i izzet ve bâʻis-i iktisâbı ucûr-ı âhiret olmağla imdi inşâallâhu’r-Rahman işbu şehr-i Ramazan’ın leyâlî-i mübârekesinde erâzil ve fıska makūlesi dükkânlarda emred ve mürahik, sâde-rû gulâmlar ile âferîş ve ülfetden menʻ u defʻ ve salât-ı terâvih edâ olundukdan sonra küşâde ve meftûh dükkân bulunmamak üzere kasaba-i hazret-i ebâ Eyüb Ensârî ve medîne-i Üsküdar ve sâir zabt u rabtı uhde-i ihtimâmlara tefvîz olunan mahallerde vâkiʻ dekâkîn ashâbına alâ-vechi’t-tehdîd tenbîh-i ekîde mübâderet ve zabt u rabt fıska ve eşkıyâ ve menʻ u defʻi ehl-i hevâ ile emniyet-i bilâd ve âsâyiş ve istirâhat-ı ibâda sarf-ı miknet ve bezl-i vüsʻ ve kudret eyleyesiz deyü. Fî gurre-i Ramazan sene 1161