Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 389 Hüküm no: 648 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Pogo v. Milo’nun ölmesi üzerine vârisleri arasında terekesinin taksiminde meydana gelen ihtilâfın giderilmesi Maʻrûz; Vilâyet-i Rumeli’nde Manastır kazâsına tâbiʻ Bukda nâm karye ahâlîsinden bahçıvan tâifesinden mürd olan Pogo v. Milo v. İsterço’nun li-ebeveyn ammi oğulları İspas ve Nedelko veledey İlya v. İsterço taraflarından karındaşları ve sâbitü’l-vekâle vasîleri olan arzuhâl sâhibi Ogtin nâm zimmî Eğrikapı hâricinde müteveffâ Ömer Efendi bahçesi demekle maʻrûf olup derûn-ı bahçede mevcûd sebzevât ve eşcâr-ı mütenevviʻa ve âlât-ı lâzime-i maʻlûmeye bi’l-verâse vazʻ-ı yedi mütehakkık olan derûn-ı arzuhâlde ismi mastûr Buğudan nâm zimmî ile Eyüb mahkemesinde baʻde’l-murâfaʻa hâlik-i mesfûr Buğudan bana ve karındaşlarıma müntakil ve mevrûs olan bahçe-i mezbûr derûnunda vâkiʻ sebzevât ve eşcâr ve âlât-ı maʻlûmeyi mesfûr Buğudan fuzûlî bi-gayr-ı hakkın zabt eder baʻde’s-suâl kasr-ı yedine tenbîh olunmak murâdımdır deyü bi’l-asâle ve’l-vekâle daʻvâ etdikde mesfûr Buğudan ber-vech-i muharrer vazʻ-ı yedini baʻde’l-ikrâr lâkin müddeʻî-i mesfûrun mûrisi hâlik-i merkūm Pogo mülkü olduğu hâlde sıhhatinde sâlifü’l-beyân sebzevât ve eşcâr ve âlât-ı lâzime-i maʻlûmenin nısflarını safka-i vâhide ile bâ-hüccet-i şerʻiyye semen-i maʻlûma mûrisim hâlik-i mesfûr İlya’ya beyʻ ve temlîk ve âhar nısflarını dahi zevcesi Katerina nâm Nasrâniye’ye bâ-hüccet-i şerʻiyye semen-i maʻlûma beyʻ ve temlîk ve ba‘dehû mezbûr Katerina mülk-i müşterâsı olan âhar nısflarını mûrisim mesfûr İlya’ya bâ-hüccet-i şerʻiyye semen-i maʻlûma beyʻ ve temlîk ve mesfûr İlya sıhhatinde şirâʼen mâlik olup baʻde vefâtihi mârru’z-zikr sebzevât ve eşcâr ve âlât-ı maʻlûme hasran vârisi olduğum vechile bana mevrûs olmuşdur deyü baʻde’d-defʻ ve’l-inkâr dâfiʻ-i mesfûr Buğudan ber-minvâl-i muharrer defʻini şuhûd-ı udûlle hasmı münkir-i mesfûr Ogtin zimmî muvâcehesinde vech-i şerʻî üzere isbât etmeğin mûcebiyle müddeʻî-i mesfûr ol vechile bî-vech muʻârazadan menʻ olunup medîne-i mezbûre mahkemesinde tescîl olunduğu huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 2 min-Ramazan sene 1161