Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 389 Hüküm no: 649 Orijinal metin no: [63b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Komşularını rahatsız ettiği için hakkında şikâyet bulunan Zoli bt. Esteryo’nun kendi rızasıyla bulunduğu mahalleden taşınacağı Maʻrûz; Havâss-ı refîʻa kazâsında vâkiʻ ashâb-ı arzuhâl Halîfe nâm karye papazı Pozma v. Dimitri ve Gavril v. Hristodoli ve Nedelko v. Yuvan ve Dimitri v. Yanaki ve Yuvan v. Kasbedin ve Dimo v. Yanaki ve Kostantin v. Yamandi ve Saturi v. Todori ve diğer Saturi v. Drako ve Yanaki v. Kiryazi ve Porgo v. Papa Tarandafilo ve Manol v. Yorgaki ve İstefan v. Margos ve İskerlet v. Lanibo ve Marko v. Buğudan ve Riga v. Lanbo ve Rali v. Nikola ve Şimo v. Yuvan nâm zimmîler meclis-i şerʻ-i hatîrde ihzâr-ı şerʻ olunan karyelerinde mütemekkine Zoli bt. İsteryo nâm Nasrâniye muvâcehesinde merkūme Zoli Nasrâniye kendi hâlinde olmayıp bed-faʻâl ve hadîdü’l-lisân olmağla dâimâ şutûm-ı galîza ile her birilerimize şetm ve ifk ü iftirâ ile ırzlarımızı pây-mâl etmek âdet-i müstemirresi olup ve’l-hâsıl evzâʻ ve etvârından mutazarrırlar olup rahatımız kalmamışdır deyü sû-i hâlini her biri ihbâr ve karyelerinden ihrâcını iltimâs etdiklerinde merkūme Zoli Nasrâniye dahi rızâsıyla karye-i mezbûreden çıkıp Kemerler cânibinde kadîmî karyesi olan Burgos karyesine nakl etmeğe müteʻahhide olmağın vech-i muharrer üzere taraf-ı şerʻden merkūme Zoli Nasrâniye’ye tenbîh ve tescîl olunduğu es-Seyyid çavuş kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 6 min-Ramazan sene 1161