Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 390 Hüküm no: 651 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hammal Hüseyin b. Ömer’in nakit para ve bazı kıymetli eşyalarının Mustafa Beşe b. Mehmed tarafından çalındığı yolundaki iddiâsını ispatlayamadığı Mahmiye-i İstanbul’da Unkapanı dâhilinde Haraçcı Mahallesiʼnde vâkiʻ Yenihân’da sâkin Hammal Hüseyin b. Ömer nâm kimesne medîne-i Eyüb’de Tülbentciler sûkunda sâkin bâʻisü’l-iʻlâm Mustafa Beşe b. Mehmed ile meclis-i şerʻde terâfuʻlarında hân-ı mezbûr ricâlinden vâkiʻ olan mevtânın mesâlihinde iken mezbûr Mustafa dahi münâsebeti olduğu cihetle gelir gider olmağla bir gün mukaddem vakt-i kuşlukda hân-ı mezkûrda odam açılıp mukaffel tahta sandık içinde mevcûd ve otuz guruş nakd akçem ile maʻlûmü’l-kıyme iki bıçak ve iki yağlık ve bir İstanbul pûşisi ve iki çekirdek tesbîhim zâyiʻ olup mezbûr Mustafa mazannamdır nukûd ve eşyâyı daʻvâ sadedinde olup ol dahi husûs-ı müddeʻâ-yı mezbûreyi baʻde’l-inkâr müddeʻî-i mezbûr müddeʻâsını isbât içün ikāmet eylediği şâhidinin biri odasında bekci taʻyîn eylediği olup ve biri dahi aldığını görmedim demekle makbûlü’ş-şehâde olmamalarıyla şâhid-i âhar ikāmetinde aczi dahi zâhir olduğundan gayrı yemîne dahi tâlib ve râgıb olmamağla mûcebiyle bilâ-beyyine ve bilâ-yemîn muʻârazadan menʻ olunduğu medîne-i mezbûre mahkemesinde tescîl olunup bi’l-iltimâs huzûr-ı âlîlerine iʻlâm olundu. Fermân hazret-i veliyyü’l-emrindir. Fî 10 min-Ramazan sene 1161