Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 391 Hüküm no: 652 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çolak Hasan Beşe’nin borcunu ödediğinin tespit olunduğu Arpacı tâifesinden İsmail Beşe b. Süleyman nâm kimesne bâʻisü’l-iʻlâm Çolak Hasan Beşe b. Mehmed nâm kimesne ile Eyüb mahkemesinde meclis-i şerʻde terâfuʻlarında mezbûr Çolak Hasan Beşe zimmetinde yedimden iştirâ ve kabz eylediği maʻlûmü’l-keyl şaʻir bahâsından olan hakkımdan bâkī kalan altmış altı guruş hakkımı vermeyip zimmetinde kalmağla meblâğ-ı bâkī-i mezbûru on beş gün mukaddem Eğrikapı kurbünde taşcı odam önünde müddeʻî-i mezbûr İsmail Beşe’ye yirmi dört zincirli altun ki altmış altı guruş olmak üzere defʻ u teslîm ol dahi baʻde’l-kabz hatta ber-vech-i muharrer Müslimîn huzûrlarında ikrâr dahi etmiş idi deyü eylediği defʻ-i mezkûrunu şuhûd-ı udûlden es-Seyyid Ali b. es-Seyyid Mustafa ve es-Seyyid Ahmed b. es-Seyyid Veli nâm kimesneler şehâdetleriyle münkir-i müddeʻî-i mezbûr İsmail Beşe muvâcehesinde vech-i şerʻî üzere isbât etmeğin mûcebiyle müddeʻî-i mezbûr meblâğ-ı bâkī-i mezbûr mütâlebesiyle bî-vech muʻârazadan menʻ-birle medîne-i mezbûre mahkemesinde tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 10 min-Ramazan sene 1161