Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 496 Hüküm no: 779 Orijinal metin no: [88a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin borcunu ödemesi Maʻrûz-ı dâʻî-i Devlet-i aliyyeleridir ki; Bâʻisetü’l-iʻlâm el-Hâce Ümmühani bt. Hüseyin nâm hatun Eyüb mahkemesine ihzâr etdirdiği Mehmed Beşe nâm kimesne ile murâfaʻa olup beynimizde maʻlûm kar bahâsından baʻde’l-hesâb mezbûr Mehmed Beşe zimmetinde kırk dört buçuk guruş hakkımdan bâkī otuz iki buçuk guruş hakkım olup ikrâr dahi etmiş iken taleb etdiğimde edâda taʻallül eder deyü daʻvâ ol dahi bi’l-külliye inkâr etmekle müddeʻiye-i mezbûre el-Hâce Ümmühani Hatun müddeʻâ-i mezbûresini Duhânî el-Hâc Osman b. Ömer ve Mustafa b. İbrahim nâm şâhidîn-i muʻaddilîn şehâdetleriyle muvâcehesinde vech-i şerʻî üzere isbât etmeğin mûcebiyle meblâğ-ı bâkī-i mezbûr otuz iki buçuk guruşu müddeʻiye-i mezbûre el-Hâce Ümmühani Hatun’a edâ ve teslîm eylemek üzere mezbûr Mehmed Beşe’ye tenbîh olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâdis aşer min-Saferi’l-hayr sene selâse ve sittin ve miʼe ve elf.