Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 496 Hüküm no: 780 Orijinal metin no: [88a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balat ve Fener iskelelerinde görev yapan arka hamallarının Eyüb’deki meslektaşlarını rahatsız etmelerine mani olunması Maʻrûz-ı dâʻî-i Devlet-i aliyyeleridir ki; Medîne-i Hazret-i Ebâ Eyüb el-Ensârî’de İskele Mahallesi’nde ashâbü’l-iʻlâm arka hamallarının iştikālarına binâʼen Vâlidesarayı Ser-bölüğü Ahmed Bey mübâşeretiyle meclis-i şerʻa ihzâr olunan Balat ve Fener iskeleleri arka hamallarından Hasan b. Halil ve Hüseyin b. Hasan ve Osman b. Hasan ve İsmail b. Hüseyin ve Ortakapılı Seyyid Ömer b. Mehmed nâm kimesneler ile zimmîlerden Agop v. Margos ve Agop v. Toros ve Artin v. Mercan ve Avakim v. Parsam ve Mardiros v. Panos ve Toros v. Bedros nâm zimmîler baʻde’l-yevm nizâm-ı kadîmleri üzere meʼmûr oldukları mahallerde yükümüz kaldırıp âharın hudûdlarına tecâvüz eylememek ve beynlerinde maʻlûm nizâmları üzere amel ve hareket ve hilâfına tasaddî ile birbirlerini rencîde etmemek üzere ahd ü misâk ve birbirlerini kefîle rabt ve medîne-i mezbûrenin arka hamalları dahi minvâl-i ahd ü mîsâklarına binâʼen katʻ-ı nizâʻ eyledikleri tescîl olunup bi’l-iltimâs huzûr-ı âlîlerine iʻlâm olundu. Bâkī fermân men-lehü’l-emrindir. Fî 10 Safer sene 1163