Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 502 Hüküm no: 792 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife’nin başka mahalleye gönderilmesi Maʻrûz-ı dâʻî-i Devlet-i aliyyeleridir ki; Havâss-ı aliyye kazâsında Halkalı-yı kebîr ahâlîsinden işbu bâʻisü’l-iʻlâm Mehmed b. Ali nâm kimesne karye-i mezbûreden ihzâr-ı şerʻ olunan Ali b. Ahmed nâm kimesne muvâcehesinde mezbûr Ali’nin zevcesi gāibete ani’l-meclis Hanife nâm hatun dil-azâr ve kendi hâlinde olmadığından bî vech nazar eyleyip hakīkat-i hâl suâl ve iʻlâm olunmak murâdımdır deyicek ahâlî-i karyeden meclis-i şerʻa hâzirûn olan Mehmed b. Mustafa ve Ali. b. Salih ve Ali b. Hüseyin ve Abdullah b. Salih ve Mustafa b. Ali ve İbrahim b. Ahmed ve Halil b. Ali ve Abdi b. Halil ve Mehmed b. Mustafa ve Osman b. İbrahim ve Ali b. Mehmed nâm kimesnelerden baʻde’s-suâl müddeʻî-i mezbûr Mehmed ve merkūm Ali’nin hüsn-i hâllerini ve merkūm Ali’nin zevcesi gāibe-i mezbûre Hanife her vechile dil-azâr ve kendi hâlinde olmadığına binâʼen fesâd zuhûruyla cümle müteellimleriz deyü mezbûrenin sû-i hâlini her biri ihbâr ve karyelerinde sâkine olmamak üzere ihrâcını iltimâs etdiklerinden merkūm Ali zevcesi gāibe-i mezbûre Hanife’yi mahâll-i âhara çıkarmak üzere taʻahhüd ve bu vechile tescîl ve katʻ-ı nizâʻ eyledikleri bi’l-iltimâs huzûr-ı âlîlerine iʻlâm olundu. Bâkī fermân men-lehü’l-emrindir. Fi’l-yevmi’l-hâdî aşer min-Muharremi’l-harâm li-sene selâse ve sittin ve miʼe ve elf.