Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 506 Hüküm no: 799 Orijinal metin no: [90b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar Seyyid Halil Ağa’nın hırsızlıkla suçladığı Hasan hakkındaki iddiâsını ispatlayamadığı Maʻrûz-ı dâʻî-i Devlet-i aliyyeleridir ki; Attâr es-Seyyid Halil Ağa nâm kimesne ihzâr-ı şerʻ olunan Hasan nâm kimesne ile terâfuʻ etdikde beş gün mukaddem Salı gecesi baʻde’l-işâ medîne-i Eyüb sûkunda attâr dükkânımdan bir çuka biniş ve bir çuka çakşır ve on vakıyye mikdârı duhânım zâyiʻ olup mezbûr Hasan baʻzı kez dükkânıma gelir deyü mazannam olmak üzere ihzâr etdirmiş idim deyü eylediği daʻvâ-yı mezkûresini beyân içün ikāmet eylediği Berber el-Hâc Mustafa mezbûr Hüseyin’i dükkân önünde gördüm deyü şehâdeti tâm olmayıp ve şâhid-i âhar ikāmetinden aczi şerʻan zâhir ve mezbûr Hasan tahlîf olunmağla mezbûr Hasan üzerine sirka misilli töhmet sâbit ve zâhir olmamağla sebîli tahliye olunup bilâ-beyyine muʻârazadan müddeʻî-i mezbûr Attâr es-Seyyid Halil Ağa menʻ-birle medîne-i mezbûr mahkemesinde baʻde’t-tescîl bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Gurre-i Muharremi’l-harâm sene 1163