Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 506 Hüküm no: 800 Orijinal metin no: [91a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Komşularını rahatsız ettikleri için başka mahalleye ihraçları talep olunan Rukiye, Ayşe ve Fâtıma’nın aynı mahallede ikâmet etmelerine izin verilmesi Maʻrûz-ı dâʻî-i Devlet-i aliyyeleridir ki; İzzetlü bostancıbaşı ağa tarafından haseki kulları maʻrifetiyle baʻde’t-tefahhus medîne-i Eyüb’de Düğmeciler Mahallesi sâkinelerinden işbu Halil Beşe’nin zevcesi Rukiye işbu dâmadı es-Seyyid Mehmed’in zevcesi Fâtıma mezbûre Rukiye’nin âhar kızı Âişe zevclerinin adem-i muhâfazalarına binâʼen ve yine mahalle-i mezbûrede gāibe ani’l-meclis Safiye ve diğer Rukiye’den her birleri ırzlarıyla mukayyed olmayıp onların dahi nâ-mahremden ictinâbları yokdur deyü sû-i hâllerini mahalle-i mezbûre İmamı Mustafa Efendi ve Müezzini Molla Mustafa ve cemâʻat-i Müslîm ihbâr ve ihrâclarını iltimâs etdiklerinde mezbûr Halil Beşe menzilini beyʻ ederim deyip ve âharları müstecire olmalarıyla her biri âhar mahalleye çıkmak üzere müteʻahhid oldukları beş ay mukaddem bu vechile tescîl olunmuş idi. Lâkin çıkmaya müteʻahhid olanlardan mezbûrân Safiye ve Rukiye nâm hatunlar hâlâ mahallede sâkineler olup ve mülk menzili olan mezbûr Halil Beşe’nin zevcesi Rukiye dahi müsinne ve ırzlarıyla olmak üzere ahd-i eymân edip onların nefslerine dahi yine mahalle-i mezbûre ahâlîsinden kasabdan Ahmed Efendi ve es-Seyyid Mustafa Efendi ve Abdi Ağa ve Ahmed Odabaşı ve İsmail Çelebi ve es-Seyyid İbrahim Çelebi nâm kimesneler kefîl olmalarıyla mezbûr Halil Beşe ve zevcesi Rukiye’ye merhameten mülk menzilinde ke’l-evvel ikāmetlerine izin ve müsâʻade buyrulmak bâbında fermân-ı âlîşânları sudûrunu ilhâh ve iltimâs eyledikleri maʻlûm-ı devlet-i Âsafâneleri buyruldukda bâkī fermân hazret-i veliyyü’l-emrindir. Fi’l-yevmi’s-sâlis min-Muharremi’l-harâm li-sene selâse ve sittin ve miʼe ve elf.