Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 507 Hüküm no: 801 Orijinal metin no: [91a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un boşandığı kocası Mustafa Efendi’den para talep etmesinin uygun olmadığı Maʻrûz-ı dâʻî-i Devlet-i aliyyeleridir ki; Medîne-i Hazret-i Ebâ Eyüb el-Ensârî’de Çavuş Kasım Mahallesi sâkinelerinden zâtı taʻrîf-i şerʻî ile muʻarrefe derûn-ı arzuhâlde mastûrü’l-ism Fâtıma bt. Mustafa nâm hatun zevc-i sâbıkı sâhib-i arzuhâl Kadı Mustafa Efendi ile terâfuʻlarında mahalle-i mezbûrede vâkiʻ maʻlûmü’l-hudûd menzilimin nısfını bundan akdem benden iki yüz guruş semen-i medfûʻa bâ-hüccet-i şerʻiyye iştirâ etdikden sonra ba‘dehû sekiz yüz guruşa bana beyʻ ben dahi iştirâ ve kabûl etmişdim semen-i evvelden ziyâde kabz olan meblâğ-ı mezbûru taleb ederim deyü mütesaddiye olduğu ziyâde daʻvâsı mezbûr Mustafa Efendi’nin yedinde olan fetvâ-yı şerîfe mûcebince meşrûʻa olmadığından mâʻadâ zevciyetden mufârakātlarında hukūk-ı zevciyete ve hukūk-ı şerʻiyye-i sâireden beynlerinde cereyân eden ahz u iʻtâ ve muʻâmelât-ı şettâya müteʻallika âmme-i deʻâvî ve mutâlebâtdan ve kâffe-i muhâsamâtdan merkūm Mustafa Efendi’nin zimmetini ibrâ-i âmm ve kātıʻu’n-nizâʻla ibrâ ve iskāt eylediğini mukırra ve muʻterife olmağın mûcebiyle müddeʻiye-i mezbûre Fâtıma Hatun Mustafa Efendi ile bî-vech muʻâraza ve mutâlebeden menʻ olunup tescîl olunduğu huzûr-ı âlîlerine irsâl olundu. Bâkī fermân hazret-i veliyyü’l-emrindir. Fi’l-yevmi’s-sâlis min-Muharremi’l-harâm li-sene selâse ve sittin ve miʼe ve elf.