Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 521 Hüküm no: 807 Orijinal metin no: [94b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zefiri’yi darbedip kendisine cinsel istismarda bulunanların kefâlete bağlanmaları Maʻrûz-ı dâʻî-i Devlet-i aliyyeleridir ki; Havâss-ı refîʻa kazâsında suyolu karyelerinden Burgos nâm karye ahâlîsinden Yanaki nâm zimmî Petnehor nâm karyeden arzuhâlde isimleri mezkûrân Mehmed ve Kara Ali nâm kimesneleri baʻde’l-ihzâr muvâcehelerinde târîh-i iʻlâm senesi Zilhiccesi’nin dokuzuncu arefe günü karye-i mezbûreye karib mevziʻde oğlum işbu Zefiri nâm sagîri mezbûr Mehmed fesâd içün ahz ve iʻânetiyle karye-i mezbûrda sâkin Edirneli mezbûr Kara Ali darb ve fiʻl-i şenîʻ etmişler idi deyü velâyetim hasebiyle baʻde’d-daʻvâ ve’l-inkâr ve’l-münâzaʻa vesâtet-i muslihîn ile beş guruş bi-tarîkı’s-sulh medfûʻları olmağla baʻde’l-yevm mezbûr Mehmed kendi hâlinde ırzıyla mukayyed olup mezbûr Kara Ali dahi fî-mâ baʻd karye-i mezbûrede sâkin olmayıp yine Edirne cânibine gitmeye taʻahhüd ve her biri cürmlerine tevbe ve istiğfâr etdiklerinden sonra mezbûrân Mehmed ve Kara Ali’den bir kimesne mâlen ve bedenen ve ırzen zarâr ve ziyân erişmemek üzere mezbûrânın nefslerine ve hîn-i mütâlebelerinde huzûr-ı hükkâm-ı zevi’l-ihtirâma ihzârlarına mârru’z-zikr Petnehor karyesi ahâlîsinden meclis-i şerʻa hâzirûn olan Ali Beşe b. Hasan ve Sarı Mehmed b. Bâyezid ve Hasan b. Abdullah ve Osman b. Ahmed ve Sarı Mehmed b. Abdullah nâm beş nefer kimesnelerden her biri kefîl olup ol beş nefer kimselerin nefislerine ve lede’l-iktizâ ihzârlarına karye ahâlîsi bi-ecmaʻihim kefîller olmağla zimmî-i mesfûr Yanaki dahi bâlâda takrîr ve tasaddî eylediği daʻvâ-yı mezbûresinden fâriğ olup katʻ-ı nizâʻ etdikleri baʻde’t-tescîl huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâdis ve’l-ışrîn min-Zilhicceti’ş-şerîfe li-sene isneyn ve sittin ve miʼe ve elf.