Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 523 Hüküm no: 811 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Deli Mehmed’in şikâyetiyle hapse atılan İbrahim’in iyi hâline komşularının şahitlik ettikleri Maʻrûz-ı dâʻî-i Devlet-i aliyyeleridir ki; Sâhibe-i arzuhâl Âişe nâm hatun sadrî oğlu İbrahim içün kendi hâlinde ırzıyla mukayyed hilâf-ı şerʻ vazʻ u hareketi yoğiken derûn-ı arzuhâlde mezkûr olan Deli Mehmed nâm kimesneden hakkını taleb etmekle adâvet ve hakkında iftirâ ve iştikâ ile bi-gayr-ı hakkın ahz u habs ile gadr olmağla keyfiyet-i ahvâli vukūf-ı tammı olan bî-garaz kimesnelerden suâl ve iʻlâm olunması bâbında eylediği arzuhâli-birle sâdır olan fermân-ı âlîlerine imtisâlen Medîne-i Hazret-i Eyüb el-Ensârî −radiya anhu Rabbihi’l-Bârî’de− sâkin oldukları Cezerî Kasımpaşa Mahallesi ahâlîsinden mezbûrun ahvâline muttaliʻ li-ecli’l-ihbâr meclis-i şerʻa hâzirûn olan İmam es-Seyyid Yahya Efendi eş-Şeyh es-Seyyid Abdülgani ve sâbıkā Otakçılar Hamamcısı Süleyman Ağa ve Ahmed Çelebi b. Mehmed ve Hamâmî el-Hâc Ali ve Hüseyin b. Hüseyin ve Mehmed b. Mustafa ve el-Hâc İbrahim b. Hasan ve Ahmed b. İsmail ve Hazînedâr Hüseyin Ağa ve Mehmed Çelebi ve el-Hâc Hasan b. Abdullah ve Mehmed b. Hüseyin ve es-Seyyid Salih b. es-Seyyid Ömer nâm kimesnelerden tefahhus ve suâl olundukda mezbûr İbrahim her vechile kendi hâlinde ırzıyla mukayyed bir derd-mend olup hakkında olunan iştikâ ve iftirâ hilâf-ı vâkiʻdir hüsn-i hâlinden gayrı ahvâli maʻlûmumuz olmamışdır deyü hasbeten li’l-müteʻâl sıhhat ve hakīkati üzere her birleri mezbûr İbrahim’in hüsn-i hâlini ihbâr ve hilâf-ı vâkiʻ olunan ifitirâ ve iştikâya binâʼen vâlidesi mezbûreye merhameten ve merkūm İbrahim’in nefsine ve lede’l-mütâlebe ihzârlarına cümlesi kefîller olmalarıyla sebîli tahliye olunmak üzere istidʻâ-yı merhamet eyledikleri baʻde’t-tescîl huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâdis ve’l-ışrîn min-Zilhicceti’ş-şerîfe li-sene isneyn ve sittin ve miʼe ve elf.