Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 524 Hüküm no: 812 Orijinal metin no: [95a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un bulunduğu mahalleden çıkarılması talebi Maʻrûz-ı dâʻî-i Devlet-i aliyyeleridir ki; Medîne-i Hazret-i Eyüb’de merhûm Nişancı Paşa Mahallesi’nde mülk menzili olan derûn-ı arzuhâlde mastûretü’l-ism Havvâ nâm hatun mahalle-i mezbûreden sâhib-i arzuhâl Muhyiddin ile murâfaʻa, müddeʻiye-i mezbûre Havvâ’nın menziline duhûl ve bezini katʻ eylediği mezbûr Muhyiddin’in yemînden nükûlüyle sâbit ve iʻlâm olunup ba‘dehû mezbûr Muhyiddin müddeʻiye-i mezbûre Havvâ Hatun zevci gāib ani’l-meclis Veli nâm kimesne ile ittifâk ve zevcemi ıdlâl menzilinde Suyolcu Mehmed nâm ecnebî ile cemʻ ve haber alıp menzile duhûl ve zevcemi sarhoş bulup ihrâc eyledim vukūf-ı tammı olan Müslimînden suâl ve iʻlâm olunmak murâdımdır dedikde mahalle-i mezbûre İmamı Mehmed Efendi ve cemâʻat-i Müslimînden Molla Abdurrahman b. Mustafa ve Bardakcı Ömer b. Hüseyin ve el-Hâc Osman b. Mustafa ve Halil b. Abdullah ve Hüseyin b. Hasan ve el-Hâc Ali b. Mustafa ve Abdi Beşe b. İbrahim ve es-Seyyid Hasan b. İbrahim ve Ali Ağa b. Hasan ve Suyolcu Ahmed b. Hasan ve Sâdık Mehmed b. Ali nâm kimesnelerden suâl olundukda fi’l-hakīka hâl mezbûr Muhyiddin’in takrîr eylediği vech üzere olduğundan gayrı mezbûre Havvâ zevciyle maʻan sâkin oldukları menzile her bâr ecnebîler gelip ahvâllerinden hoşnûd değilleriz deyü sû-i hâllerini muvâcehelerinde her biri ihbâr ve ihrâcını iltimâs etdikleri tescîl olunup huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâmin ve’l-ışrîn min-Zilhicceti’ş-şerîfe li-sene isneyn ve sittin ve miʼe ve elf.