Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 525 Hüküm no: 814 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şamlar karyesi koru ve arazisinin Maksud b. Abbas’a kirâlandığı Maʻrûz-ı dâʻî-i Devlet-i aliyyeleridir ki; Havâss-ı aliyye kazâsında Şamlar nâm karye ahâlîsinden Kara Mustafa b. Mehmed ve Osman b. Ömer ve Mustafa b. Mehmed ve Musa b. Ali ve Mehmed b. Hasan ve Uzun Mehmed b. İbrahim b. Yusuf ve Halil b. Mustafa ve es-Seyyid Mehmed b. Ahmed nâm kimesneler asâleten ve âharları taraflarından bi’l-vekâle meclis-i şerʻde sâhib-i arzuhâl celep tâifesinden Maksud b. Abbas muvâcehesinde karyemizin kışlak taʻbîr olunur mukātaʻalı koru ve arâzi-i mevkūfeyi işbu hâzır bi’l-meclis İsmail Ağa nâm kimesne çiftliği mülhakātından olan hanı koyunların raʻy edip otundan ve suyundan intifâʻ etmek üzere iʻtâ olunan temessük mantûku üzere bin yüz altmış iki senesi rûz-ı Kâsım’ı ibtidâsından altmış üç senesi içinde rûz-ı Hızır’a değin müstakillen yüz seksen gün tamamına değin kışlağı zabt ve koyunların raʻy ve kışladıp zabtına bir ferd mümânaʻat eylememek üzere cümle ahâlî-i karye bi’l-ittifâk yüz on beş guruşa mezbûr Maksud’a îcâr olunduğu baʻde’l-istîcâr ve’l-kabûl meblâğ-ı mezbûru her birimiz bi-kadri’l-hısas ahz u kabz edip zikr olunan kışlak müddet-i mezbûra değin işbu mezbûr Maksud’un taht-ı icâresinde olduğunu her birleri ikrâr ve iʻtirâf edip koyunların raʻy ve kışladıp zabt u rabtına mümânaʻat eylememek üzere taʻahhüd eylemeleriyle mezbûr Maksud dahi cümleyi tasdîk ve bundan akdem ber-vech-i muharrer tescîl etdirdikleri fermân-ı âlîlerine imtisâlen huzûr-ı Âsafânelerine iʻlâm olundu. Bâkī fermân hazret-i veliyyü’l-emrindir. Fî 21 min-Zilhicce li-sene isneyn ve sittin ve miʼe ve elf.