Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 526 Hüküm no: 818 Orijinal metin no: [95b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hırsızlıkla suçlanan Feyzullah Beşe’nin iyi hâline komşularının şâhitlik ettikleri Maʻrûz-ı dâʻî-i Devlet-i aliyyeleridir ki; Yenikapı hâricinde Merkezefendi Mahallesi sükkânından Mehmed nâm kimesne meclis-i şerʻde mahalle-i mezbûre sâkinlerinden ciğerci tâifesinden Feyzullah Beşe nâm kimesne muvâcehesinde iki gün mukaddem menzilim duvarını gece delip mülküm olan bir kazgan ve kantarma ve balta ve bir kantarım sirka olunup mazannam olan mezbûr Feyzullah’dan taleb ederim deyü eylediği daʻvâsı sâbit olmayıp mezbûr Feyzullah’a yemîn verildikden sonra keyfiyet-i ahvâli meclis-i şerʻa hâzirûn olan mahalle-i mezbûre İmamı Mehmed Efendi ve Müezzin Mustafa ve cemâʻatlerinden Mehmed Ağa ve İsa Çelebi ve Halil Beşe ve Mehmed Ağa ve Mehmed Çelebi ve Ömer Beşe nâm kimesneleri kemâl-i taharrî üzere tefahhus ve suâl olundukda mezbûr Feyzullah hâl-i sugūrundan bu âna değin mahallemizde sâkin olmağla sirka misilli töhmet ile ittihâm olunduğu bir kimesnenin maʻlûmlarımız olmamışdır ve ifk ü iftirâdan hâlî değildir deyü hasbetenlillâh hüsn-i hâlini her biri haber verip muvâcehesinde mûcib-i sû-i hareketi sâbit olmadığı medîne-i Eyüb mahkemesinde baʻde’t-tescîl izzetlü bostancıbaşı ağa hazretleri tarafından taʻyîn buyrulan Çukadâr Ali ve Davud Paşa ustası kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’r-râbiʻ ve’l-ışrîn min-Zilhicce li-sene isneyn ve sittin ve miʼe ve elf.