Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 527 Hüküm no: 819 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasköy’de yaşayan Yahûdilerin subaşıları tarafından yeni vergi talebiyle rencîde edilmelerine mani olunması Hasköy’de vâkiʻ Yahûdilerin fermânı. Akzâ kuzâti’l-Müslimîn evlâ vülâti’l-muvahhidîn maʻdeni’l-fazl ve’l-yakīn râfiʻu aʻlâmü’ş-şerîʻati ve’d-dîn vârisü ulûmi’l-enbiyâ-i ve’l-mürselîn el-muhtass bi-mezîd-i inâyeti’l-Meliki’l-Muʻîn Mevlânâ Hâslar kādısı −zîdet fezâiluhu− tevkīʻ-i refîʻ-i hümâyûn vâsıl olıcak maʻlûm ola ki; Havâss-ı refîʻa kazâsı muzâfâtından Hasköy’de sâkin zimmî ve Yahûdi reʻâyâsı Dersa‘âdetim’e arzuhâl edip mesfûrlar subaşıları tarafından baʻzı rüsûmât-ı muhdese mütâlebesiyle rencîde olunmalarıyla menʻi içün emr-i şerîfim verilmek ricâ etmeleriyle hilâf-ı kānun ve defter ve mugāyir-i muʻtâd-ı kadîm mutâlebât-ı muhdese ile fukarâ-yı raʻiyyet rencîde etdirilmemek üzere emr-i şerîfim verilmek bâbında iftihâru’l-ümerâ ve’l-ekâbir bi’l-fiʻil başdefterdârım Mehmed -dâme ulüvvühu- telhîs etmeğin imdi telhîsi mûcebince amel olunmak bâbında fermân-ı âlîşân sâdır olmuşdur buyurdum ki; hükm-i şerîfim vardıkda bu bâbda sâdır olan emrim üzere amel edip dahi göresin mesfûrların subaşıları tarafından baʻzı rüsûmât-ı muhdese mütâlebesiyle rencîde olundukları vâkiʻ ise ol takdîrce hilâf-ı kānun ve defter ve muğāyir-i muʻtâd-ı kadîm mutâlebât-ı muhdese ile fukarâ-yı raʻiyyeti rencîde ve remîde etdirmeyesin şöyle bilesin alâmet-i şerîfe iʻtimâd kılasın. Tahrîren fi’l-yevmi’s-sâmin aşer min-Şaʻbân li-sene isneyn ve sittin ve miʼe ve elf. Be-makām-ı Kostantıniyye