Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 528 Hüküm no: 820 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehrî Ali Ağa’nın vergilerini ödemedikleri gerekçesiyle şikâyet ettiği Asvadar ve Toma isimli zimmîlerin vergilerini ödediklerinin anlaşıldığı Maʻrûz-ı dâʻî-i Devlet-i aliyyeleridir ki; Sâhib-i arzuhâl Şehrî Ali Ağa nâm kimesne kasaba-i Hasköy mütemekkinlerinden derûn-ı arzuhâlde isimleri mezkûrân Asvadar ve Toma nâm zimmîler ile terâfuʻ etdiklerinde ber-vech-i mâlikâne mutasarrıf olduğum Hasköy subaşılık mukâtaʻâsının baʻzı avâid ve rüsûmâta müteʻallik yedimde olan bir kıtʻa ihbâr iʻlâmında mastûr olduğu üzere şerbetcilik kârıyla meşgūl olan mesfûrân zimmîler mâhiye akçelerin edâda muhâlefet ederler deyü arzuhâl-birle daʻvâ ve mütâlebe etdikde mesfûrân bi’l-külliye inkâr edip yedlerinde menʻ ve defʻi nâtık iʻlâm-ı şerʻî mûcebince defterhânesinden derkenâr olduğu üzere raʻiyyet kaydoldukları karye zâbitine hukūk ve rusûmların kānun ve defter muktezâsınca edâ eylediklerinden sonra hilâf-ı kānun ve defter ve muğāyir-i muʻtâd-ı kadîm rencîde olunmayıp menʻ u defʻi bâbında emr-i âlîşân ısdâr ve bi’l-muvâcehe kırâet ve mûcebiyle amel olunup fî-mâ baʻd hilâf-ı şerʻ-i şerîf ve muğāyir-i muʻtâd-ı kadîm rencîde eylememek üzere merkūm Şehrî Ali Ağa’ya tenbîh-i şerʻî olunduğu huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 5 min-Şaʻbân li-sene isneyn ve sittin ve miʼe ve elf.