Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 534 Hüküm no: 833 Orijinal metin no: [97b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Premedi kazasından gelip ihtidâ eden Hasan’ın hırsızlık ve sair suçları işlediği tespit olunduğundan bulunduğu mahalleden ihrâcı Maʻrûz-ı dâʻî-i Devlet-i aliyyeleridir ki; Davudpaşa ustası ağa kulları maʻrifetiyle Yenikapı havâlîsinde sükkânı iştikâsına binâʼen ahz ve meclis-i şerʻa ihzâr etdirdikleri Rumeli’nde Premedi kazâsında Pavli nâm karyeden olup dört sene mukaddem bahçelerde yanaşma iken şeref-i İslâmla müşerref ve altmış iki çolaklar yoldaşından olduğunu iddiʻâ eden Hasan nâm mühtedî muvâcehesinde Merkez Efendi Mahallesi İmamı Mehmed Efendi ve İsa b. Hüseyin ve Müezzin Mustafa Çelebi ve el-Hâc Mahmud Mahallesi’nden Halil b. Abdullah ve Hasan b. Abdullah ve diğer Halil b. Abdullah nâm kimesneler ve ol havâlîde bahçıvan ustaları bi-ecmaʻihim ahz olunan mezbûr Hasan her ne vakitde gelip gördüğümüzde fesâd ve sirkaya müteʻallik husûslar zuhûruyla müteellimler olup keyfiyet-i ahvâl ve efʻâli maʻlûmumuz olmamağla etrâf havâlîye gelmesinden mutazarrırlarız ırzan, mâlen ve bedenen emniyetimiz yokdur hakīkat-i hâli iʻlâm ediverin deyü taʻzîm ve mezkûr gelmemek üzere menʻi iltimâslarıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Min- selh-i Zilka‘deti’ş-şerîfe sene 1162