Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 534 Hüküm no: 834 Orijinal metin no: [97b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirkapı’da inşâ olunan cami ve ahâlinin ihtiyaçları olan suyun temini Sûret-i hatt-ı şerîfdir. Mûcebince ihsân-ı hümâyûnum olmuşdur. Hak sübhânehu ve teʻâlâ hazretleri, Şevketlü kerâmetlü kudretlü mehâbetlü adâletlü Pâdişâh-ı âlîşâh efendimiz hazretlerinin mübârek vücûd-ı hümâyûn-ı adâlet-makrûnlarında hatasız edip serîr-i saltanat-masîr-i mülûkânelerinde dâim eyleye amin −bi-hürmeti seyyidü’l-mürselîn− Kemerler’de vâkiʻ bend-i kebîre kadden iki buçuk zirâʻ müceddeden bend zamîmesiyle imâd olunduğundan −bi-hamdillâhi teʻâlâ− sura kesret hâsıl olup Demirkapı kurbünde izn-i hümâyûnlarıyla taraf-ı kullarından binâsına şurûʻ olunan câmiʻ-i şerîf ve ahâlî-i mahallenin kemâl-i ihtiyâcı olmağla ittisâlinde çeşme binâ ve ibâdullaha irvâ ve câmiʻ-i şerîf musluklarına dahi icrâ içün bend-i kebîrden bir buçuk masura mâ-i lezîz inâyet ve ihsân-ı hümâyûnları buyrulmak ricâsıyla arzuhâl olundu. Emr u fermân şevketlü kerâmetlü kudretlü mehâbetlü adâletlü Pâdişâh-ı âlîşâh −halledallâhu teʻâlâ hilâfetihi ilâ-yevmi’l-intibâh− efendimiz hazretlerinindir. Bende: Beşir Ağa Dârü’s-saʻâdet-i şerîfe