Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 535 Hüküm no: 836 Orijinal metin no: [97b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemerci dükkânında kanunlara aykırı olarak bakkal esnâfına mahsus malzeme satan Osman’a mani olunması Maʻrûz-ı dâʻî-i Devlet-i aliyyeleridir ki; Medîne-i Ebâ Eyüb el-Ensârî ve tevâbiʻi Hasköy’de vâkiʻ ashâb-ı arzuhâl bakkal esnâfının pazarbaşıları Mustafa Çelebi ve Ali Yazıcı ve el-Hâc İbrahim nâm kimesneler ile Tanaş ve Bihor ve Panayot ve Yani ve Servan ve Balıkçıoğlu Dimo ve sâirleri meclis-i şerʻ-i hatîrde medîne-i mezbûre sûkunda turşucu karşısında dükkânı olan Kemerci Osman muvâcehesinde yedimizde olan emr-i âlîşânda mastûr olduğu üzere bakkal ihdâs etmek ve bakkal esnâfına mahsûs zehâyiri beyʻ eylemek memnûʻâtdan iken mezbûr Osman kâr u kisbine kanâʻat etmeyip hilâf-ı emr-i âlîşân bakkal metâʻı ve sâir zehâyiri beyʻle nizâmımızın ihtilâline bâʻis ve bâdî olmağla mazmûn-ı emr-i şerîf ile amel ve hilâfına vazʻ u hareket eylememek üzere tenbîh ve iʻlâm olunmak matlûbumuzdur deyü takrîrlerine muvâfık emr-i şerîf ibrâzıyla iştikâ etdiklerinde mezbûr Osman dahi mazmûn-ı emr-i âlî ve nizâm-ı kadîmlerine muhâlif ve mugāyir bakkāllara mahsûs olan metâʻı beyʻini ikrâr ve iʻtirâf ve baʻde’l-yevm hilâf-ı emr-i âlîşân ve mugāyir-i nizâm-ı kadîm [98a] bakkal metâʻı beyʻle esnâf-ı mezbûreyi rencîde ve remîde etmeyip kendine mahsûs olan kisbine râzı olup mevcûd olan bakkal metâʻını narh-ı rûzîsi üzere esnâfa beyʻa taʻahhüd eylediği huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’r-râbiʻ ve’l-ışrîn min-Zilka‘deti’ş-şerîfe li-sene isneyn ve sittin ve miʼe ve elf.