Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 536 Hüküm no: 837 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boğularak vefât eden Molla Süleyman’ın babası Eyüb Çelebi’nin oğlunun cebinde parası olduğunu bilmediğinden hiç kimsenin töhmet altında bulundurulmamasını ifâde ettiği Maʻrûz-ı dâʻî-i Devlet-i aliyyeleridir ki; Havâss-ı aliyye kazâsında Çavuş nâm karyede iki çiftlik beyninde Karagöl demekle maʻrûf gölden geçerken garîkan fevt olmağla bundan akdem kıbel-i şerʻden keşf ve iʻlâm olunduğu üzere eser-i cerhi olmayıp garîkan fevt olan Molla Süleyman’ın ol vakitde refîkleri işbu hâzırân bi’l-meclis Mehmed ve Mustafa nâm kimesneler akşama değin meks ba‘dehû işbu Sığırtmaç Petko zimmîye iki altun veririz bekle deyü sipâriş etdiklerinde havfından nâşî bırakmağla fevtinden akçesi zâyiʻ olmak zuʻmuyla izzetlü bostancıbaşı ağa hazretleri kıbel-i âlîlerinden Serrac Mehmed Haseki kulları mübâşeretiyle meclis-i şerʻa ihzâr etdirdikleri Yakub Çelebi müstecir olduğu çiftlik sığırtmacı mesfûr Niko ve gece Kethüdâsı Rail ve Molla Ali müstecir olduğu çiftlik Kethüdâsı Zafiri zimmîlerden akçe maddesi tefahhus ve suâl, her birileri haber [ve] âgâhımız yokdur deyü inkâr ve yemîn edecekleri mukarrer ve müteveffâ-i mezbûrun babası Eyüb Çelebi nâm kimesne dahi garîkan vefât eden oğlum Molla Süleyman’ın yanında akçesi olduğuna vâkıf olmamağla mesfûrûna iftirâ olup daʻvâ ve nizâʻım yokdur deyip refîkleri mezbûrân Mehmed ve Mustafa’nın dahi mütâlebeleri olmayıp şerʻan mesfûrûn üzerlerine töhmet sâbit olmamağla taʻarruz olunmayıp sebîlleri tahliye olunmak üzere Eyüb mahkemesinde tescîl olunduğu Serrac Mehmed Haseki iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâmin min-Zilhicce sene 1162