Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 538 Hüküm no: 843 Orijinal metin no: [98b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sünbüle lakablı Semiha’nın bazı kıymetli eşyasının Cemaatbaşı Yasefʼin elinde kaldığı yolundaki iddiâsını taciz için yaptığının anlaşıldığı Maʻrûz-ı dâʻî-i Devlet-i aliyyeleridir ki; Dîvân-ı âlîlerinde Eyüb mahkemesinde meclis-i şerʻ-i hatîrde sâhibe-i arzuhâl Sünbüle ismi ile mülakkabe Semiha nâm Yahûdiye hasmı olup derûn-ı arzuhâlde mastûrü’l-ism Cemaʻatbaşı Yasef Yahûdi ile üç defʻa terâfuʻ etdiklerinde defter-i müfredât ile bi-tarîkı’l-emâne iddiʻâsı olan eşyâ-i maʻlûmeden mübâşiri Mustafa Çavuş maʻrifetiyle mesfûr Yasef yedinden kabzını muʻterife olduğu telli Hatâyî beyaz kaftan maʻa anteri ve Acem dîbâsı yeşil kaftan maʻa anteri ve telli kaplı kakım kürk ve on yemenî ve çarşeb ve sûzenî işleme kaftan maʻa anteri ve Hind şâlîsi kaftan maʻa anteri ve telli kaplı su samuru kürk ve telli Hatâyî kaftan maʻa anteri ve dîbâ şalvar ve bir yakut yüzükden mâʻadâ altun bilezik ve gerdanlık ve dört küpe ve boğça makremeler ve on bir çatma yasdık ve üç çift makʻad ve beş minder bakır evânî yedinde kalmış idi deyü eylediği daʻvâ-yı mezbûresini mesfûr Yasef bi’l-külliye inkâr edip müddeʻiye-i mezbûreye ikāmet-i beyyine içün kirâren ve mirâren mehl-i şerʻî verilip bir vechile ikāmet-i beyyine edemeyip yemîn dahi vermeyip müddeʻiye-i mezbûre Yahûdiye’nin Cemâʻatbaşısı mesfûrdan eşyâ-i sâbite daʻvâsı işbu hâzır bi’l-meclis zevc-i muhâlıʻı olan İspirili Yahûdi ile tecdîd-i akd-i nikâh olunmadığına binâʼen tezvîr olup murâdı mücerred taʻcîz olduğu nümâyân olmağın müddeʻiye-i mezbûre Semiha Yahûdiye bilâ-beyyine-i âdile bî-vech muʻârazadan menʻ olunup tescîl olunduğu mübâşir-i merkūm iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 15 min-Zilkaʻde li-sene isneyn ve sittin ve miʼe ve elf.