Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 543 Hüküm no: 853 Orijinal metin no: [99a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüfenkci Osman Çelebi’nin gasbettiği duvar taşlarının iâdesi câriyesine sahip çıkmasının tenbih edildiği Maʻrûz-ı dâʻî-i Devlet-i aliyyeleridir ki; Medîne-i Ebâ Eyüb el-Ensârî’de Evlice Baba Mahallesi sâkinlerinden işbu bâʻisü’l-iʻlâm Bostanî Süleyman Bey nâm kimesne mahalle-i mezbûre sükkânından olup ihzâr-ı şerʻ olunan Tüfenkci Osman Çelebi nâm kimesne ile terâfuʻlarında mezbûr Osman Çelebi beynimizde maʻlûm mülküm olan duvar taşlarını fuzûlî ahz ve menzili duvarına zam eyledi deyü bundan akdem baʻde’d-daʻvâ ve’l-ikrâr teslîmine tenbîh-i şerʻî olunmuş iken adem-i itâʻate binâʼen vermeyip yedinde kalmışdır deyü daʻvâ ol dahi ikrâr ve adem-i itâʻati zâhir olmağla taʻzîrine ve zikr olunan taşları teslîme tenbîh olunup mezbûr Osman Çelebi’nin câriye-i memlûkesinin dahi sû-i hareketinden müteezzî olduklarına Mahallesi ahâlîsi inhâ ve iştikâ etmeleriyle mezbûr Osman Çelebi’ye zikr olunan taşları müddeʻî-i mezbûr Süleyman Bey’e teslîme ve câriye-i mezbûreyi tedîb edip zabt u rabta taʻahhüd ve bu vechile katʻ-ı nizâʻ etdikleri baʻde’t-tescîl bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’t-tâsiʻ aşer min-Zilkaʻdeti’ş-şerîfe li-sene isneyn ve sittin ve miʼe ve elf.