Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 543 Hüküm no: 855 Orijinal metin no: [99b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlyaszâde Mahallesi’ndeki Mehterbaşı bostanının kiracısının intihâr ettiğinin anlaşıldığı Maʻrûz-ı dâʻî-i Devlet-i aliyyeleridir ki; Sâdır olan fermân-ı âlîlerine imtisâlen savb-ı şerʻ-i enverden Mevlânâ es-Seyyid Mustafa Efendi irsâl olunup ol dahi Havâss-ı refîʻa’ya muzâfe Topkapısı hâricinde İlyaszâde Mahallesiʼnde vâkiʻ Mehterbaşı bostanı demekle maʻrûf bostanın müsteciri maslûben hâlik olan Kosta v. Marko nâm zimmînin lâşesi üzerine varıp Haslar Subaşısı Haseki Mehmed Ağa ve müseccelü’l-esâmî Müslimîn ile li-ebeveyn karındaşı Foti nâm zimmî hâzır olduğu hâlde maslûb-ı mesfûrun cesedine nazar etdiklerinde eser-i cerh olmayıp târîh-i iʻlâmdan bir gün mukaddem bostan-ı merkūm derûnunda bahçıvan odasının kirişine kendini salb ve ol ecilden maslûben hâlik olduğunu baʻde’l-muʻâyene ve’l-keşf lâşesini zîr-i hâke ilkāya izin-birle tenbîh eylediğini mevlânâ-yı mezbûr mahallinde tahrîr ve maʻan baʻs olunan ümenâ-i şerʻle meclis-i şerʻa gelip alâ-vukūʻıhî inhâ eylediği bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-hâdî aşer min-Zilkaʻdeti’ş-şerîfe li-sene isneyn ve sittin ve miʼe ve elf.