Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 550 Hüküm no: 868 Orijinal metin no: [101a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emanet verilen gerdanlık konusunda Ümmü Gülsüm Hatun’un iddiâsını ispatlayamadığı Maʻrûz-ı dâʻî-i Devlet-i aliyyeleridir ki; Arzuhâlde mezkûratü’l-ism olup zâtı taʻrîf-i şerʻî ile muʻarrefe Ümmü Gülsüm derûn-ı arzuhâlde mezkûr Hasköy’de Abdüsselâm Mahallesi mütemekkinelerinden Papaz zevcesi Sumel nâm Nasrâniye ile terâfuʻ etdikde sâhibe-i arzuhâl işbu Âişe Hatun’un menzilinden bir elmas gerdanlık ile mâşâallah resmi elmasını alıp üzerime hükmolunmağla ben dahi zikr olunan gerdanlık ile mâşâallah resmi elması on gün mukaddem Hasköy’de saray-ı hümâyûn önünde tarîkde mesfûre Sumel Nasrâniye’ye emâneten vermiş idim taleb ederim deyü daʻvâ, mesfûre Sumel Nasrâniye bi’l-külliye münkire olduğundan mâʻadâ müddeʻiye-i mezbûre Ümmü Gülsüm bundan akdem Hasköy’de nâibü’ş-şerʻ olan Mehmed Abdülbaki Efendi huzûrunda benimle murâfaʻa ve zikr olunan gerdanlık ile mâşâallah resmi elması benden daʻvâ ve müddeʻâsına ikāmet-i beyyineden izhâr-ı acz ve tahlîf etdirmekle müddeʻiye-i mezbûre Ümmü Gülsüm Hatun bilâ-beyyine-i âdile bî-vech muʻârazadan menʻ-birle nâib-i mûmâ-ileyh işbu bir kıtʻa iʻlâmı tahrîr ve iʻtâ etmiş idi deyü takrîrine muvâfık iʻlâm ibrâz ve müddeʻâ-yı mezkûreyi baʻde’l-inkâr müddeʻiye-i mezbûre Ümmü Gülsüm’den müddeʻâsına mutâbık tekrar beyyine taleb olundukda Galata kulesi kurbünde Kalafatcı Mahallesiʼnde sâkin olmak üzere getirdiği tüccârdan Mustafa b. Süleyman ve yine mahalle-i mezbûrede sâkin olmak üzere getirdiği Çubukcu Mustafa b. Mehmed ve yine mahalle-i mezbûrede sâkin olmak üzere getirdiği Çizmeci Mehmed b. Halil, üç nefer kimselerin hîn-i şehâdetde takrîrleri müddeʻiye-i mezbûrenin takrîr-i daʻvâsına muvâfık olmadığından gayrı udûlden olmadıkları dahi şerʻan zâhir olmağla cerh olunup mesfûre Sumel Nasrâniye yedinde olup ısdâr eylediği fermâna imtisâlen âhar şâhid-i adl ikāmet etmek üzere müddeʻiye-i mezbûre Ümmü Gülsüm Hatun’a tenbîh-i şerʻî olundukda huzûr-ı âlîye dahi gelmeyip daʻvâsında tezvîr fehm olunmağla müddeʻiye-i mezbûre Ümmü Gülsüm bî-vech muʻârazadan menʻ olunduğu baʻde’t-tescîl huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’r-râbiʻ min-Zilkaʻdeti’ş-şerîfe li-sene isneyn ve sittin ve miʼe ve elf.