Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 552 Hüküm no: 874 Orijinal metin no: [101b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap İbrahim Beşe ve ortaklarının borçlarını ödemeleri Maʻrûz; Celep tâifesinden işbu hâmilü’l-iʻlâm Nako nâm zimmî kasab zümresinden meclis-i şerʻa ihzâr olunan İbrahim Beşe ve şerîki İsmail Beşe muvâcehelerinde her reʼsi kırk yedişer para otuz reʼs ganem ve her reʼsi kırk beşer paraya yüz otuz beş reʼs keçi mezbûrân iştirâ ve kabz edip zimmetlerinde cemʻan yüz seksen yedi guruş beş para hakkımdan bâkī seksen bir guruş kırk akçe hakkımı mezbûrân İbrahim Beşe ve İsmail Beşe’den taleb ederim deyü daʻvâ etdikde mezbûrân dahi ber-vech-i ikrâr ve iʻtirâflarından sonra müddeʻî-i mesfûr Celep Nako ile baʻde’n-nizâʻ işbu hâzır bi’l-meclis Bakkāl Tarandafilo’dan alâ-mehil edâ ve teslîm etmek üzere ikimiz karz altmış sekiz guruş istikrâz edip müddeʻî-i mesfûr Celep Nako’ya edâsı lâzım deynim olan mikdârdan altmış sekiz guruşu edâ edip mâʻadâdan fâriğ olmuş idi deyü defʻe tasaddî ve cihet-i karzdan <> altmış sekiz guruş zimmetlerimizde alâ-mehil işbu Bakkāl Tarandafilo’ya edâsı lâzım ale’s-seviyye deynimizdir deyü ikrâr ve iʻtirâf ve cihet-i karzdan tecîl iddiʻâları meşrûʻ olmayıp ikrâr ve iʻtirâflarına binâʼen meblâğ-ı mezbûr altmış sekiz guruşu mesfûr Bakkāl Tarandafilo’ya edâ ve teslîm etmek üzere mezbûrân İbrahim Beşe ve şerîki mezbûr İsmail Beşe’ye tenbîh olunup ve mesfûr Tarandafilo’nun cihet-i karzdan zimmetinde ikrârıyla sâbit altmış sekiz guruşu müddeʻî-i mesfûr Celep Nako’ya edâ ve teslîm etmek üzere ikrârına binâʼen mesfûr Bakkāl Tarandafilo’ya tenbîh olunup medîne-i Eyüb mahkemesinde tescîl olunduğu bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 24 min-Ramazani’l-mübârek sene 1162