Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 553 Hüküm no: 875 Orijinal metin no: [101b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cuhûd Burgos karyesindeki Beylik bahçe bahçıvanının bıçakla yaralandığının tespit olunduğu Maʻrûz-ı dâʻî-i Devlet-i aliyyeleridir ki; Havâss-ı aliyye kazâsında Cuhûd Burgos karyesinde Beylik bahçede bahçıvan tâifesinden işbu hâmilü’l-iʻlâm Niko nâm zimmînin iltimâsıyla bahçe-i mezbûrede ba‘dehû meclis-i şerîfde hâzırlar olan Müslimîn ile uzvuna nazar olundukda sağ tarafında boğazı altından ve gerdânı üstünden bıçak ile darb ve cerhi lede’l-muʻâyene zâhir olup işbu mesfûr Niko’nun karındaşı Risto nâm zimmînin dahi iltimâsıyla uzvuna nazar olundukda sol kolu dirseği altından bıçak ile darb ve cerh ve sağ gözü üstü kara bere olduğu baʻde’l-muʻâyene zâhir olup cârihleri istintak olundukda hasmımız ve iddiʻâmız Cuhûd Burgos bahçesi neferâtlarından hâzır bi’l-meclis Berber Ali nâm kimesnedir adâveti olmakla iki gün mukaddem kuşluk vaktinde refîksiz yalnız bahçeye duhûl ve zafer bulmağla ber-vech-i muharrer bi-gayr-ı hakkın bıçak ile darb ve cerh etmişdir deyü taʻyîn ve beyâna havâle olunup mezbûr Berber Ali dahi kendi uzvunda cerh olmak üzere iddiʻâ ve keşfini iltimâs etmekle nazar olundukda cerh ve kara bereye müteʻallika eser olmadığı Eyüb mahkemesinde tescîl, bi’l-iltimâs taʻyîn olunan Ali Haseki mübâşeretiyle huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 28 Ramazan sene 1162