Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 564 Hüküm no: 899 Orijinal metin no: [103b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yani’ye iftira atıldığının anlaşıldığı Maʻrûz; Mahmiye-i İstanbul hısnı ebvâbından Takyecibaşı Mahallesi mütemekkinelerinden Moske bt. Ağya nâm Nasrâniye’nin anası ve tarafından vekîli olan Bahar nâm Nasrâniye mahalle-i mezbûrede bakkal olan hâmilü’l-iʻlâm Yani zimmînin müseccel vekîli Papa Dimo nâm zimmî muvâcehesinde bundan akdem kızım müvekkile-i mezbûre Moske’yi idlâl eyledi deyü mesfûr Bakkāl Yani’den iştikâsına binâʼen li-ecli’l-ihbâr meclis-i şerʻa hâzirûn olan mahalleleri İmamı Ahmed Efendi ve cemâʻatlerinden Kâtib Mehmed Şehabeddin ve Molla Ömer b. Mehmed ve Mustafa b. Mehmed ve Mustafa b. Hasan ve Mehmed Beşe b. Hasan ve Mustafa b. Mehmed ve Abdurrahman b. Süleyman ve Yusuf b. Ali ve Ahmed b. Ali nâm kimesneler ile Papa Minek ve Papa Avanes ve Mardik ve Yanaki ve Tarandafil ve Donek nâm zimmîlerden her birleri mahallemizde bakkal olan mesfûr Yani zimmî kendi hâlinde olup bu âna değin bir türlü sû-i hâli olmayıp kendi hâlinde biliriz müvekkile-i mezbûre Moske’ye sevdâ ârız olmağla mesfûr hakkında iştikâsı iftirâ ve hilâf-ı vâkiʻdir deyü haber verdiklerinden mâʻadâ mesfûr Bakkāl Yani üzerine şerʻan töhmet sâbit olmamağla vekîl-i mesfûre Bahar Nasrâniye tarafından bi-gayr-ı vech-i şerʻî taʻarruz iktizâ etmemekle daʻvâsından nükûl ve katʻ-ı nizâʻ eylediği Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Fî 26 Şaʻbân sene 1162