Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 564 Hüküm no: 900 Orijinal metin no: [103b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zaim Mustafa Ağa’nın kendisine hizmet eden Abdullah Ağa’nın hak ettiği ücreti ödemesi Maʻrûz-ı dâʻî-i Devlet-i aliyyeleridir ki; Medîne-i Hazret-i Ebâ Eyüb el-Ensârî’de sâkin sâhib-i arzuhâl Abdullah Ağa nâm kimesne yine medîne-i mezbûre sâkinlerinden derûn-ı arzuhâlde mezkûrü’l-ism olan züʻamâdan Mustafa Ağa nâm kimesne ile dîvân-ı sadr-ı Âsafî’de ba‘dehû Eyüb mahkemesinde terâfuʻ etdiklerinde bin yüz elli dokuz senesinde zaʻim-i mezbûr Mustafa Ağa Hısn-ı Mansur kazâsında vâkiʻ mutasarrıf olduğu zeʻâmetini zabt ve mahsûlü her ne ise ahz u kabz ve îsal içün ecr-i misline muʻâdil beş yüz guruş ücret kavliyle tarafından beni tevkîl edip ben dahi vusûl-i ittibâʻım ile bir sene zeʻâmet-i mezbûreyi bi’l-vekâle zabt ve bin beş yüz guruş mezbûr Mustafa Ağa’ya teslîmim olup baʻde tamamü’l-hizme kavlimiz üzere beş yüz guruş ücretimi bugün yarın deyü avk ü tehir edip hâlâ vermeyip zimmetinde kalmışdır suâl olunup ücretim olan meblâğ-ı mezbûr beş yüz guruşu zaʻim-i mezbûr Mustafa Ağa’dan taleb ederim deyü daʻvâ etdikde zaʻim-i mezbûr Mustafa Ağa dahi cevâbında müddeʻî-i mezbûr Abdullah Ağa’yı sene-i mezbûrede zeʻâmeti husûsuna tevkîl ve ol mikdâr meblâğı kendine vusûl ve kabz eylediğini ikrâr ve iʻtirâf edip ve mahsûlâtından müddeʻî-i mezbûrun ziyâde kabzını daʻvâ içün beş yüz guruş ücret kavlini inkâr etmekle müddeʻî-i mezbûr Abdullah Ağa’dan ber-vech-i muharrer müddeʻâsına mutâbıka beyyine taleb olundukda ikāmet-i beyyineden izhâr-ı acz-birle istihlâf etmeğin zaʻim-i mezbûr Mustafa Ağa’ya bi’d-defâʻat yemîn teklîf olundukda yemîn etmeyip yemîninden nükûlüyle beş yüz guruş ücreti şerʻan sâbit olmağın mûcebiyle hükm ve meblâğ-ı mezbûr beş yüz guruşu müddeʻî-i mezbûr Abdullah Ağa’ya edâ ve teslîm eylemek üzere zaʻim-i mezbûr Mustafa Ağa’ya tenbîh olunduğu Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâmin ve’l-ışrîn min-Şaʻbâni’l-muʻazzam li-sene isneyn ve sittin ve miʼe ve elf.