Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 565 Hüküm no: 901 Orijinal metin no: [103b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ahmed Efendi’ye küfreden Molla Nebi’nin cezalandırılması Maʻrûz; Medîne-i Eyüb’de Zâl Paşa-yı Tahtânî medresesinde sâkin işbu bâʻisü’l-iʻlâm el-Hâc Ahmed Efendi nâm kimesne medîne-i mezbûre mahkemesinde meclis-i şerʻ-i hatîre ihzâr etdirdiği Molla Nebi nâm kimesne ile terâfuʻlarında mezbûr Molla Nebi seni boğazlarım bre kâfir ve Yahud ve mürted deyü bana şetm eyledi deyü baʻde’d-daʻvâ ve’l-inkâr müddeʻî-i mezbûr el-Hâc Ahmed’i ber-vech-i muharrer müddeʻâsını yine medrese-i mezkûre sâkinlerinden baʻde’t-tezkiye adâletleri zâhir olan Hâfız İsmail Efendi b. Halil ve Osman Efendi b. İbrahim ve Salih b. Abdullah nâm şâhidûn-ı muʻaddilûn şehâdetleriyle münkir-i mezbûr muvâcehesinde vech-i şerʻî üzere isbât etmeğin mûcebiyle mezbûr Molla Nebi’ye şerʻan taʻzîr lâzım geldiği medîne-i mezbûre mahkemesinde tescîl olunup bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fî selh-i Ş sene 1162