Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 565 Hüküm no: 902 Orijinal metin no: [103b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karcı Hasan’ın Kasap Yorgi’den alacaklı olduğu yolundaki iddiâsını ispatlayamadığı Maʻrûz-ı dâʻî-i Devlet-i aliyyeleridir ki; Medîne-i Ebâ Eyüb Ensârî’de sâkin derûn-ı arzuhâlde mezkûr kasab zümresinden olup Karcı Hasan nâm kimesne yine Eyüb’de mütemekkin kasab zümresinden arzuhâl eden Yorgi ile terâfuʻ edip mesfûr Yorgi zimmînin karındaşında yüz elli guruşum olup kefîl olmuş idi deyü eylediği daʻvâsında henüz karındaşıyla hesâbımızı görmeyip firâr edip deyn mikdâr-ı maʻlûmum değildir deyü daʻvâ-yı mezbûresinden rücûʻ ve birkaç gün sonra cihet-i kefâletden seksen üç guruş hakkım vardır deyü daʻvâya şurûʻ ve kasab tâifesinden ikāmet eylediği maʻlûmü’l-esâmî iki nefer şâhidi şerîkleri ve bir neferi yazıcısı olmağla makbûlü’ş-şehâde olmayıp âhar şâhid taleb olundukda zafer bulamamağla ikāmet-i beyyineden acz ve mesfûr Yorgi şâhid-i zûr ikāmetiyle bana gadr sadedindedir deyü bu vechile huzûr-ı âlîlerinde murâfaʻaya âhar arzuhâli-birle fermân-ı âlî ısdâr etmekle imtisâlen li’l-emr huzûrda murâfaʻaya tenbîh ve havâle olundukda gelmeyip kendini ihtifâ ve mübâşirini defʻ edip ba‘dehû bir mahfî mahalde kendisine tâbiʻ kimesneler ile mesfûr Yorgi zimmîyi tahvîf ile cebren ve kerh ile yedinden ahz eylediği bir kıtʻa temessük ile cihet-i sulhden altmış guruşu mesfûr Yorgi’den tekrar daʻvâ ve mütâlebesinde zâhir-i hâl mükezzeb olup sırran ve alenen tecessüs olundukda daʻvâsı tezvîr olduğu inde’ş-şerʻ zâhir ve nümâyân olmağla iltifât olunmayıp müddeʻî-i mezbûr Hasan bî-vech muʻârazadan menʻ-birle tescîl olunduğu huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 28 min-Şaʻbâni’l-muʻazzam sene 1162