Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 566 Hüküm no: 903 Orijinal metin no: [104a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdüsselam Mahallesi’nde Hacı Ali’nin dükkânında et satmasının kanunlara uygun olduğu Havâss-ı refîʻa muzafâtından kasaba-i Hasköy’de Sütlüce cânibinde vâkiʻ Abdüsselâm Mahallesi’nde Odalar kapısı nâm mahalde kadîmden çeyrek kasab dükkânı olup ibâdullahın zarûret ve muzâyakaların defʻ içün olageldiği minvâl üzere bu defʻa dahi Eyüb’de vâkiʻ Kassab el-Hâc Ali selhhânesi ashâbından oğlu olup tarafından kadîmîsi üzere el-Hâc Ali taʻyîn olan dükkân-ı mezkûra kanâdâr taʻyîn yaz ve kış kadr-i kifâye ıslâh-ı lahm-ı ganem bulunup narh-ı cârî üzere beyʻ u şirâ olunmak üzere işbu hâzırân bi’l-meclis es-Seyyid Mustafa Çelebi b. İbrahim ve Mehmed b. el-Hâc Ali nâm kimesnelerden her birleri taʻahhüd ve kasab esnâfının Çeyrekciler Kethüdâsı el-Hâc Mustafa ve Yiğitbaşıları es-Seyyid Mehmed ve hırfet-i mezbûr ricâlinden maʻlûmü’l-esâmî kimesneler mezbûrân kefîller olup taʻarruz olunmamak bâbında bi’l-cümle ahâlî-i mahallenin istidʻâları kasaba-i mezbûre nâibi dâʻîlerinin iʻlâmı mantûku üzere fi’l-hakīka muhtâclar olmağla kefîlleri tescîl olunan mezbûrân es-Seyyid Mustafa ve Mehmed Tâife-i çeyrekciyân yedlerinde izin ve ruhsat verildiğini nâtık bâlâsına hatt-ı hümâyûn keşîde kılınan emr-i şerîf ve mazmûnu ile amel olunagelen defterde mastûr ve şürûtları üzere ibâdullahın muzâyakalarını defʻ içün muhtâclar olup yaz ve kış selhhâne-i mezbûre tarafından taʻyîn olan Hacı Ali’nin dükkânına bin yüz on sekiz senesinden beri lahm-ı ganem irsâl ve kadîmî narh-ı cârî üzere beyʻ ü şirâʻ etdirilmek içün mahalle-i mezbûre ve civâr mahalleler ahâlîsinden cemm-i gafîr bî-garaz Müslimîn meclis-i şerʻa gelip senedâtlar muktezâsınca merâmlarına müsâʻade olunmak bâbında fermân-ı âlîleri sudûrunu istidʻâ-yı merhamet eyledikleri iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’r-râbiʻ min-Ramazani’l-mübârek li-sene isneyn ve sittin ve miʼe ve elf.