Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 567 Hüküm no: 904 Orijinal metin no: [104a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmâl ve mâl-ı mefkûd kabzına memur Subaşı Mehmed’e el koyduğu Mito’ya ait koyun ve eşyalarının iadesi Maʻrûz-ı dâʻî-i Devlet-i aliyyeleridir ki; Sâhibe-i arzuhâl Mito zimmîye bundan akdem gaybet-i münkatıʻa ile gāʼib olduğu hâlde Havâss-ı aliyye muzâfâtından Terkos nâhiyesinde Şamlar nâm karyede beytülmâl ve mal-ı mefkūd kabzına meʼmûr olan derûn-ı arzuhâlde mezkûrü’l-ism Subaşı Mehmed’in nâhiye-i mezbûre nâibi es-Seyyid Salih Efendi’nin imzâsıyla mümzât defter mûcebince mefkūd olmak üzere yüz seksen altı reʼs ganemi müddet-i örfiye hulûlü ve mâliki zuhûruna değin bi’l-emâne kabz ve hıfzında iken kelebek marazı müstevlî olup yirmi beş reʼsi helâk mâʻadâ yüz altmış bir ganem müddet-i örfiyesi tamamında her reʼsi doksan yedişer akçe kıymet-i misilleriyle maʻrifet-i şerʻle füruht olunan ganem bahâsı on beş bin altı yüz on akçe ile hıfzında olan müddet-i maʻlûmede hâsıl leben bahâsından bin yedi yüz akçe ve bargir ve merkep ve iki bakraç kıymetleri bin yedi yüz yirmi bir akçe ki; cemʻan on dokuz bin otuz yedi akçeden çoban hakkı ve merʻa otu ve resm-i emîn ve harc-ı defter masâ[r]ıflarından altı bin dokuz yüz otuz yedi akçe ve aynı mevcûd yapağıyı mesfûr Mito zimmîye edâ ve teslîmi iktizâ etmekle emîn-i merkūma tenbîh-i şerʻî olundukdan sonra hâric ez-defter ziyâde ağnâm ve eşyâ müddeʻâsına emîn-i merkūm tahlîf-i şerʻî olunmağın ziyâde mütâlebesiyle mesfûr Mito bilâ-beyyine muʻârazadan menʻ olunduğu Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-hâmis ve’l-ışrîn min-Şaʻbâni’l-muʻazzam sene 1162