Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 568 Hüküm no: 906 Orijinal metin no: [104a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Antrana’ya kalan bir çift altın bilezik ve sâir kıymetli eşyaların âidiyeti hakkında karar verilemediği Maʻrûz; Sâhibe-i arzuhâl Antrana nâm sagīrenin babası, velîsi ve vasîsi olan Karabet nâm zimmî meclis-i şerʻde bundan akdem mürd olan Karabet v. Ağya v. Yoseb nâm hâlikin zevcesi olup dîvân-ı âlî çavuşlarından Mustafa Çavuş mübâşeretiyle ihzâr-ı şerʻ olunan Hasköy’de Abdüsselâm Mahallesi mütemekkinelerinden derûn-ı arzuhâlde mastûrü’l-ism Benefşe bt. Abram Nasrâniye muvâcehesinde işbu yedimde olan defterde beyân olduğu üzere her miskâli dörder guruşa cemʻan beş yüz yetmiş guruş kıymetli yüz kırk iki buçuk miskāl bir çift altun bilezik ve iki başlı altun kuşak ve bir altun gerdâne ve bir altun Edirnepolî ve yine cemʻan beş yüz seksen üç guruş kıymetli bir elmaslı altun haç ve inci yakalık ve bir gök yakut altun yüzük ve telli Hatâyî kaplı karsak [102b] [102b’den buraya taşınmıştır ] kürk ve sekiz miskāl incili askı ve bir şâlî ferâce ve bir beldâr anteri ve iki kavuşdurma ve bileziz? ve bir şalvar ve mahlût otuz başlık maʻa makreme ve bir incili keselik kızım mezbûre Antrana sagīrenin mülk-i mevhûbu olup büyükbabası mürd-i mesfûrun yedinde iken hâlik oldukda vâzıʻatü’l-yed olan zevcesi üveyi anası mezbûre Benefşe’den iki buçuk ay mukaddem eşyâ-i mezbûre mütâlebe olundukda mezbûre dahi sagīre-i mezbûrenin mülk-i mevhûbu olan eşyâ-i muharrereyi zevcim mesfûrun hîn-i helâkinde ahz u kabz eyledim benimdir deyü şuhûd muvâcehelerinde kirâren ikrâr ve işhâd etmiş idi mevcûd ise aynıların değil ise baʻde’s-sübût kıymetlerin velâyeten, vesâyeten taleb ederim deyü eylediği daʻvâ-yı mezbûresini zevce-i mezbûre Benefşe Nasrâniye baʻde’l-inkâr Ayazma kapısı kurbünde mütemekkin tüccâr halîfelerinden Sahak v. Bogos nâm zimmî meclis-i şerʻde sagīre-i mezbûrenin mülk-i mevhûbu olan eşyâ-i muharrere-i mezbûreyi ahz u kabz eyledim benimdir deyü zevce-i mezbûre Benefşe Nasrâniye’nin ikrârına vech-i şerʻî üzere şehâdet edip bir şâhid dahi ikāmeti esnâsında zevce-i mezbûre Benefşe huzûr-ı âlîde murâfaʻaya fermân-ı âlî ısdâr etmekle daʻvâlarına faysal verilmeyip bu vechile zabt ve tescîl olunmuş idi. Bâkī fermân men-lehü’l-emrindir. Fî 8 Ramazan sene 1162