Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 573 Hüküm no: 918 Orijinal metin no: [105a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Ahmed’in alacağını tahsil ettiği Maʻrûz; İşbu bâʻisü’l-iʻlâm Bostanî Ahmed b. Hüseyin nâm kimesne medîne-i Eyüb mahkemesinde meclis-i şerʻ-i hatîrde Dergâh-ı âlî müteferrikalarından el-Hâc Halil Ağa nâm kimesne ile terâfuʻlarında mezbûr el-Hâc Halil Ağa zimmetinde işbu yedimde olan mümzâ ve mahtûm temessük nâtık olduğu üzere cihet-i karz-ı şerʻîden bana edâsı lâzım seksen bir guruş hakkımın bir defʻa on bir guruş ve bir defʻa on iki guruş ve bir defʻa on altı buçuk guruş ve bir defʻa dahi beş guruş ve bir rubʻ Salih yediyle bana teslîm ben dahi yedinden baʻde’l-kabz bâkī otuz altı guruş ve bir rubʻ hakkım olup bundan akdem taleb eylediğimde cihet-i mezkûreden bâkī bana ol mikdâr guruş deyni olduğunu lede’ş-şuhûd ikrâr dahi etmiş iken bana edâda taʻallül eder deyü baʻde’d-daʻvâ mezbûr el-Hâc Halil Ağa cevâbında müddeʻî-i mezbûr Bostanî Ahmed’e cihet-i mezkûreden müteferrikan ol mikdâr guruş teslîmini ikrâr bâkī otuz altı guruş ve bir rubʻ guruşunu baʻde’l-inkâr müddeʻî-i mezbûr ber-vech-i muharrer bâkī müddeʻâsını ba’de’t-tezkiye adâletleri zâhir olan iki nefer müseccelü’l-esâmî şuhûd-ı udûlle isbât etmeğin mûcebiyle meblâğ-ı mezbûrun edâsıyla mezbûr el-Hâc Halil Ağa baʻde’l-ilzâm meblâğ-ı bâkī-i mahkûmün-bih-i mezbûrdan on bir guruşu meclis-i mezbûrda müddeʻî-i mezbûra teslîm, ol dahi yedinden kabz eylediği Eyüb mahkemesinde tescîl olunduğu huzûr-ı âlîlerine iʻlâm olundu. Bâkī fermân men-lehü’l-emrindir. Fî 24 min-Şaʻbân sene 1162