Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 576 Hüküm no: 926 Orijinal metin no: [106a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zaim İsa Ağa’nın hizmetini gören Abdullah Ağa’nın hak ettiği ücretini ödemesi Maʻrûz-ı dâʻî-i Devlet-i aliyyeleridir ki; Medîne-i Ebâ Eyüb el-Ensârî’de sâkin sâhib-i arzuhâl Abdullah Ağa nâm kimesne derûn-ı arzuhâlde mezkûrü’l-ism yine Eyüb’de Çavuş Kasım Mahallesiʼnde sâkin züʻamâdan İsa Ağa nâm kimesne ile mezbûr zaʻîm İsa Ağa’nın yüz altmış bir senesinde bâ-berât-ı âlîşân mutasarrıf olduğu Güzelhisar kazâsında Hurşid nâm zeʻâmetini zabt ve âʻşâr-ı şerʻiyye ve bi’l-cümle hâsılâtını kabz, bana îsâl eyle sana beş yüz guruş ücret vereyim ve mikdâr-ı masrûfunu dahi veririm deyü beni tevkîl ben dahi kabûl ve zeʻâmeti üç nefer hizmetkârım ile bir sene tamam zabt âʻşâr-ı şerʻiyyeden bi’d-defâʻat medfûʻum bin beş yüz guruş ve zeʻâmet-i mezkûreden husûl-i maslahatına hâsılât-ı sâireden üç yüz ve kendi malımdan dahi üç yüz guruş bi-şartü’r-rücûʻ emriyle harc ve sarf etmekle ücret-i merkūmeyi ve malımdan masrûfum olan meblâğ-ı mezbûru zaʻim-i mezbûr İsa Ağa’dan taleb ederim dedikde mezbûr İsa Ağa dahi cevâbında baʻde tamami’l-hizme sana riʻâyet ederim ve mikdâr-ı masrûfunu veririm deyü sene-i mezbûrede zeʻâmetini zabta mezbûr Abdullah Ağa’yı tevkîl ve üç nefer hizmetkârı ile zabt ve âşardan bin beş yüz guruş bi’d-defâʻat kabz ve âhar vekîlim olan gāib ani’l-beled es-Seyyid el-Hâc Mehmed Ağa müddeʻî-i mezbûr Abdullah Ağa ile baʻde tamami’l-hizme hesap gördüklerinde baʻde ihrâci’l-mesârif bana âid olan iki yüz elli guruş alâ-vechi’r-risâle mezbûr Abdullah Ağa’dan ahz ve bana îsâl cemʻan bin yedi yüz elli guruş makbûzum olup müddet-i zabtında ücret ve masrûfa müteʻallika bir akçe ve bir habbe kalmadı deyü yedime iʻtâ eylediği temessük mûcebince zimmetim berî olmuşdur deyü defʻ etdikde müddeʻî-i mezbûr Abdullah Ağa cevâbında vekîli mezbûr es-Seyyid el-Hâc Mehmed Ağa Aydın muhassılı tarafından zâbit ve mütegallibeden tehdîdini îkāʻa kādir olmağla beni habs ile tazyîk ve tahvîfinden nâşî ibrâm ve tahrîr-i temessük ikrâh-ı muʻteber ile olmuş idi deyü defʻe tasaddî ve zaʻim-i mezbûr İsa Ağa defʻ-i mezbûru inkâr ve ol esnâda beyyinem mevcûd bulunmamağla istihlâf-birle sâbıkā Haslar kazâsında nâibü’ş-şerʻ-i şerîf olan müderrisîn-i kirâmdan fazîletlü Ahmed Efendi zamâmında iʻlâm olunmuş idi beyyinem hâlâ mevcûd olmağla baʻde’s-suâl icrâ-yı hak olunmak matlûbumdur deyü daʻvâ etdikde mezbûr İsa Ağa ikrâh-ı mezbûru gâh ikrâr gâh inkâr etmekle müddeʻî-i mezbûr Abdullah Ağa’dan beyyine taleb olundukda sırran ve alenen taʻdîl ve tezkiye olunup adâletleri inde’ş-şerʻ zâhir ve şehâdetleri makbûle olan Yusuf Ağa b. Abdullah ve Ali Çelebi b. Abdullah nâm şâhidîn-i muʻaddilîn şehâdetleriyle vech-i şerʻî üzere baʻde’l-isbât ikrâh-ı muʻtebere sübûtu tahakkukundan sonra mezbûr Abdullah Ağa’nın kadr-i maʻrûf masrûfu husûsu henüz maʻlum olmamağla alâ-hâlihî kalıp ve ücret kavli dahi sâbit olmayıp lâkin ücret ile hizmet eder makūlesinden olmağın şerʻan lâzım gelen ecr-i misli bî-garaz kimesnelerden suâl olundukda mukāvele olunan meblâğ-ı mezbûr beş yüz guruşu müddeʻî-i mezbûr Abdullah Ağa’nın üç hizmetkârlarıyla müddet-i mezbûrede ecr-i misline muʻâdildir deyü alâ-tarîkı’ş-şehâde haber verdiklerinde ecr-i misl-i müsemmâyı tecâvüz etmemekle tesmiye olunan meblâğ-ı mezbûr beş yüz guruşu müddeʻî-i mezbûr Abdullah Ağa’ya edâ ve teslîm etmek üzere zaʻîm-i mezbûr İsa Ağa ilzâm olunup Eyüb mahkemesinde tescîl olunduğu zâbiti tarafından taʻyîn olunan Mübâşiri Ahmed kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-âşir min-Recebi’l-ferd sene 1162