Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 584 Hüküm no: 939 Orijinal metin no: [107b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc İbrahim’in alacağını tahsîli Maʻrûz; Havâss-ı refîʻa muzâfâtından Küçükçekmece ahâlîsinden iken bundan akdem fevt olan Mustafa Beşe b. Nasuh b. Abdullah’ın verâseti zevce-i metrûkesi Fâtıma Hatun ile mezbûreden mütevellide sagīre kızı Hatice’ye münhasıra olup mezbûre Fâtıma sagīre-i merkūmenin vasîsi olmağla ihzâr-ı şerʻ-i şerîf etdirdiği bâʻisü’l-iʻlâm Dergâh-ı âlî yeniçerilerinin seksen sekiz cemâʻati ortasının nukūd-ı mevkūfesine bi’l-fiʻl mütevellîsi olan el-Hâc İbrahim huzûrunda müteveffâ-i merkūm Mustafa’nın terekesi maʻrifet-i şerʻle beyʻ olundukda merkūm el-Hâc İbrahim tereke-i müteveffâ-i merkūmdan iştirâ ve kabz eylediği eşyâ semeninden merkūm el-Hâc İbrahim’in zimmetinde üç yüz altmış beş guruş doksan beş akçe asâleten ve vesâyeten alacağım vardır deyü daʻvâ etdikde merkūm el-Hâc İbrahim tereke-i müteveffâ-i merkūmdan üç yüz altmış beş guruş doksan beş akçelik eşyâ iştirâ ve kabz etdiğini ikrâr ve iʻtirâf edip lâkin yedimde müşâhed olan muʻanven ve mersûm ve mümzâ ve mahtûm işbu temessük mûcebince müteveffâ-i mezbûr zimmetinde mütevellîsi olduğum vakfın asl-ı mâlından üç yüz seksen beş guruş alacağım olup semen-i sâlifü’z-zikri ona tutup mâʻadâsını taleb ederim deyü daʻvâ ve müddeʻâsını meclis-i şerʻ-i şerîfde hâzırlar olan ahrâr-ı ricâl-i Müslimîn’den mahmiye-i İstanbul’da Evliyâ Mahallesiʼnde sâkin Mehmed Ağa b. Mustafa ve Ahmed Efendi b. Mustafa ve Ali Odabaşı b. Halil ve Hasan Odabaşı b. Mustafa nâm kimesnelerin müddeʻâya muvâfaka şehâdetleriyle isbât edip sırran ve alenen mezbûrlar taʻdîl ve tezkiye olunup şehâdetleri hayyiz-i kabûlde vâkʻa olmağla ba‘de’t-tahlîfü’ş-şer‘î mütevellî-i mezbûr el-Hâc İbrahim’in daʻvâ eylediği üç yüz seksen beş guruşun müteveffâ-i mezbûr Mustafa’nın zimmetinde sübûtuna baʻde’l-hükm terekesinden edâsı lâzım gelmekle semen-i sâlifü’z-zikri mikdârınca deyn-i sâbite takās olunup bâkī kalan on dokuz guruş yirmi beş akçe tereke-i müteveffâ-i merkūmdan tahsîl olunmak iktizâ eylediği medîne-i Eyüb mahkemesinde baʻde’t-tescîl bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’s-sâlis aşer min-Cemâziyelâhir li-sene isneyn ve sittin ve miʼe ve elf.