Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 589 Hüküm no: 948 Orijinal metin no: [108b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mehmed b. Abdullah’ın cesedinin çeşitli yerlerinde yara-bere izlerine rastlandığı Maʻrûz; Bi’l-iltimâs savb-ı şerʻden irsâl olunan mevlânâ Mehmed Efendi Havâss-ı aliyye kazâsına tâbiʻ Çiftalan karyesi ahâlîsinden olup Ağaçlı karyesinde damadı es-Seyyid Abdülhalim’in menzilinde vefât eden Mehmed b. Abdullah’ın cenâzesi üzerine varıp karyeteyn-i mezbûreteyn ahâlîleri ile veresesinden zevcesi Afife ve kebîr oğlu Ahmed ve kebîre kızı Nefîse hâzır oldukları hâlde aʻzâsına nazar etdiklerinde göbeği üstünde el ayası kadar bir yerinde ve ufacık dö[r]t beş yerinde kan oturmuş bere olup ve iki boş böğründe şişip kabarmış ve başı kara bere olmuş bulunduğunu mevlânâ-yı mezbûr mahallinde baʻde’l-muʻâyene ve’l-keşf maʻan baʻs olunan ümenâ-i şerʻ ile meclis-i şerʻa gelip alâ-vukūʻıhî inhâ ve takrîr eyledikleri baʻde’t-tescîl bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Min-Cemâziyelâhir li-sene isneyn ve sittin ve miʼe ve elf.