Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 591 Hüküm no: 952 Orijinal metin no: [109a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yano v. Drako’yu bıçakla yaralayan Ahmed Beşe b. Ömer’in cezalandırılması Maʻrûz; Silivrikapısı dâhilinde çarıkcı odalarında mütemekkin hâmilü’l-iʻlâm Yano v. Drako nâm zimmî Haslar subaşısı maʻrifetiyle medîne-i Ebâ Eyüb el-Ensâri mahkemesine ihzâr-ı şerʻ etdirdiği Ahmed Beşe b. Ömer nâm kimesne mahzarında merkūm Ahmed Beşe târîh-i iʻlâm günü beyne’s-salâteynde Topkapısı hâricinde Fazlıpaşa çiftliği önünde bakla tarlasında bıçak ile beni amden darb ve cerh etmekle keşfolunmak matlûbumdur dedikde mesfûr Yani zimmînin uzvuna nazar olunup sağ ayağı kaynağı üstünde bıçak cerhi rüʼyet olundukda merkūm Ahmed Beşe dahi mesfûr Yano dahi bana şetm eyledi deyü amden darb ve cerh eylediğini mukırr ve muʻterif olmağla habs olunup mûcib-i cerhi mecrûh-ı mesfûrun meâl-i hâline tevkīf olunduğu baʻde’t-tescîl bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’l-hâmis min-Cemâziyelâhir li-sene isneyn ve sittin ve miʼe ve elf. 1162