Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 597 Hüküm no: 966 Orijinal metin no: [110b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin Kolo adlı zimmîye olan borcunu ödemesi Maʻrûz-ı dâʻî-i Devlet-i aliyyeleridir ki; Ekmekci tâifesinden hâmilü’l-iʻlâm Kolo zimmî meclis-i şerʻde İbrahim Çelebi muvâcehesinde mezbûr İbrahim Çelebi zimmetinde baʻde külli hesap on guruş nân-ı azîz bahâsından hakkım olmağla taleb ederim deyü daʻvâ etdikde mezbûr İbrahim Çelebi dahi vech-i muharrer üzere nân-ı azîz bahâsından baʻde külli hesap ancak beş buçuk guruş deyni olduğunu ikrâr, mâʻadâ dört buçuk guruşu dahi hesap ve edâ eylemişimdir deyü eylediği defʻini müddeʻî-i merkūm Kolo zimmî münkir olmağla mezbûr İbrahim defʻ-i mezkûrunu beyândan izhâr-ı acz-birle talebiyle mezbûr Kolo zimmî bâkī dört buçuk guruşu dahi kabz ve bir tarîk ile istîfâ-yı hak eylemediğine yemîn talep olundukda ol dahi ba‘de’t-tahlîfü’ş-şer‘î mûcebiyle meblâğ-ı mecmûʻ-ı mezbûr on guruş müddeʻî-i merkūm Kolo zimmîye edâya mezbûr İbrahim Çelebi’ye tenbîh olunduğu medîne-i Eyüb mahkemesinde tescîl olunup bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’l-âşir min-Cemâziyelevvel li-sene isneyn ve sittin ve miʼe ve elf.