Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 598 Hüküm no: 967 Orijinal metin no: [110b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaağaç semtinde bulunup yaralanma ve boğulma izi taşımayan cesedin gömülmesine izin verildiği Maʻrûz; İzzetlü bostancıbaşı ağa tarafından taʻyîn olunan Çukadâr Mustafa ve sâhib-i arzuhâl Haslar Subaşısı Mehmed Haseki maʻrifetiyle vârid olan fermân-ı âlîlerine imtisâlen savb-ı şerʻden irsâl olunan Mevlânâ Mehmed Efendi Havâss-ı aliyye kazâsına tâbiʻ hâric-i surda Karaağaç nâm mahalde tarla derûnunda vâkiʻ kuruağaç derûnunda yatar ismi nâ-maʻlûm bir zimmî lâşesi üzerine varıp cemâʻat-i Müslimîn huzûrlarında aʻzâsına nazar <> etdiklerinde şişmiş bulunmağla eser-i cerh ve hank mütebeyyin olmadığını mevlânâ-yı mezbûr vâkiʻ hâli mahallinde baʻde’l-keşf ve’t-tahrîr lâşesini zîr-i hâke idhâle izin verildiğinden sonra maʻan baʻs olunan ümenâ-i şerʻle meclis-i şerʻa gelip alâ-vukūʻıhî inhâ ve takrîr eylediği bi’l-iltimâs huzûr-ı âlîlerine iʻlâm olundu. Fermân men-lehü’l-emrindir. Fi’l-yevmi’s-sânî aşer min-Cemâziyelevvel li-sene isneyn ve sittin ve miʼe ve elf.