Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 601 Hüküm no: 975 Orijinal metin no: [111a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turşucuzâde Hüseyin Çelebi Vakfı’na aid olup Nefriye’nin tasarrufunda iken mütevellî izniyle Afife Hatun’a satılan menzilin tahliyesi Maʻrûz; Derûn-ı arzuhâlde mezkûrü’l-ism Afife nâm hatunun tarafından husûs-ı âti’l-beyânda vekîl-i sâbitü’l-vekâlesi İmam Mehmed Efendi bin Şaban sâhib-i arzuhâlin zevcesi Nefriye nâm Nasrâniye muvâcehesinde Havâss-ı refîʻa muzâfâtından Hasköy’de nezâretinde olan merhûm Turşucuzâde Hüseyin Çelebi Vakfı’ndan olup bir tarafdan Asayîoğlu tasarrufunda olan vakf menzil ve bir tarafdan tarîk-i hâs ve iki tarafdan tarîk-i âm ile mahdûd maʻlûmü’l-müştemilât menzilde sâkine olan mezbûre Nefriye Nasrâniye menzil-i merkūma bi’l-icâreteyn mutasarrıfe iken bin yüz altmış senesi Cemâziyelevvelîsi gurresinde yüz elli guruş bedel-i makbûz mukābelesinde işbu yedimde müşâhed temessük mantûkunca müvekkilem mezbûre Afife’ye izn-i mütevellî ile katʻî ferağ etmişdir, ihrâcını taleb ederim deyü kāimmakām mütevellîsi Hüseyin Çelebi mahzarında daʻvâ etdikde mezbûre Nefriye Nasrâniye menzil-i mezbûru târîh-i mezbûrede bedel-i merkūm mukābelesinde bâ-izn-i mütevellî müvekkile-i mezbûre Afife Hatun’a ferağ-ı katʻî ile ferağını mukırra ve muʻterife olmağın mûcebiyle hükmolunup mezbûre Nefriye târîh-i iʻlâmdan otuz bir gün tamamına dek bedel-i mezbûru vermek üzere menzil-i vakf-ı mezbûra tâlibe olmağla ol dahi reʼy-i mütevellî ile fâriğa olmak üzere ahd ü misâk-birle tescîl etdirdikleri es-Seyyid Ahmed Çavuş iltimâsıyla huzûr-ı âlîlerine iʻlâm olundu. Bâkī fermân men-lehü’l-emrindir. Fî 23 min-Cemâziyelevvel li-sene 1162