Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 602 Hüküm no: 977 Orijinal metin no: [111b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Dimitraki’nin Yusuf b. Abdullah tarafından bıçakla yaralandığının tespit olunduğu Maʻrûz-ı dâʻî-i Devlet-i aliyyeleridir ki; Havâss-ı aliyye kazâsında Nifoz nâm karye ahâlîsinden karye-i mezbûrede bakkal olan işbu hâmilü’l-iʻlâm Yorgi v. Dimitraki nâm mecrûhun iltimâsıyla hasmı olup rençber zümresinden Yusuf b. Abdullah nâm kimesne hâzır olduğu hâlde Cerrâh es-Seyyid Salih Çelebi ve Müslimîn ile mecrûh-ı mesfûrun uzvuna nazar olundukda sol tarafında kasığı üstünden bıçak ile cerh ve cerh yarası olduğu lede’l-muʻâyene ve’l-keşf baʻzı husûmet tahakkukundan sonra mecrûh-ı mesfûr Yorgi işbu mezbûr Yusuf muvâcehesinde mezbûr Yusuf târîh-i iʻlâm gecesi beyne’l-iʻşâîn karye-i mezbûrede dükkânım içinde âlet-i cârihadan bıçak ile müşâhed olan kasığım üstünden bi-gayr-ı hakkın amden darb ve cerh edip ahz olunduğu esnâda hatâʼen bıçak ile darb ve cerh eyledim deyü kirâren ikrâr ve işhâd dahi etmeğin mûcib-i şerʻîsini taleb ederim deyü mezbûr Yusuf’dan baʻde’d-daʻvâ ve’l-inkâr müddeʻî-i mecrûh-ı mezbûr Yorgi zimmî işbu mezbûr Yusuf’un hatâʼen bıçak ile darb ve cerh eyledim deyü ikrârını lede’t-tezkiye şehâdetleri makbûle olan udûl-i Müslimîn’den el-Hâc Halil b. Hasan ve Ali Bey b. Ömer nâm kimesneler şehâdetleriyle vech-i şerʻî üzere baʻde’l-isbât cerh-i mezbûrun mûcib-i şerʻîsi icrâsı berʼ-i tâm husûlüne tevfîk-birle Eyüb mahkemesinde baʻde’t-tescîl Vidos ustası kıbelinden bölükbaşısı olan Ahmed Bey kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’r-râbiʻ ve’l-ışrîn min-Rebîʻi’l-âhir li-sene isneyn ve sittin ve miʼe ve elf.